2017-2021 yillarda O'zbekiston Respublikasini rivojlantirishning beshta ustuvor yo'nalishi bo'yicha harakatlar strategiyasi
Iftixor mahallasi yanada obod bo‘ladi

Prezident tashrifidan so‘ng

Prezidentimiz joriy yil 18-19 mart kunlari Toshkent viloyatiga tashrifi chog‘ida Chirchiq shahridagi Iftixor mahallasida ham bo‘lib, hududning ijtimoiy-madaniy muhitini yaxshilash bo‘yicha bir qator topshiriqlar bergan edi.

Mazkur ishlarni amalga oshirish uchun viloyat ichki ishlar boshqarmasi boshlig‘i polkovnik Tohir Aripov boshchiligida tezkor shtab tashkil etildi. Ayni paytda mahalladagi mavjud kamchiliklarni bartaraf etish, namunali hududga aylantirish yuzasidan amaliy sa’y-harakatlar boshlangan. Mas’ullar dastlab mahalla hududini piyoda aylandi. Har bir ko‘cha, ko‘p qavatli uy, bog‘cha, maktab, dala hovli va suv havzasi atroflari ko‘zdan kechirdi. Ushbu joylarni obodonlashtirish va ko‘kalamzorlashtirish ishlari nazoratga olindi.

Jumladan, o‘tgan bir hafta davomida hamkor tashkilotlar bilan birgalikda hududdagi ming metr masofadagi ichki ariqlar tozalanib, ko‘chalar tekislandi va 63 ta eski tipdagi avtoturargohlarning o‘rniga yangisini qurish rejasi tasdiqlandi. Mahalladagi mavjud 400 taga yaqin daraxtlarga shakl berilib, oqlandi. Ko‘p qavatli uylardagi kamchiliklar bartaraf etildi, ko‘chalarga tungi chiroqlar o‘rnatildi. Mahalla aholisining murojaatlari tinglandi. O‘ndan ortiq murojaat joyida ijobiy hal etildi. “Yoshlar daftari”, “Ayollar daftari”, va “Temir daftar”ga kiritilgan fuqarolar bilan alohida suhbat o‘tkazilib, muammolarini ijobiy hal etish bo‘yicha mas’ullarga topshiriqlar berildi.

Mahalladagi ijtimoiy-madaniy muhitni yaxshilash borasida amalga oshirilayotgan ishlar davom etmoqda.

26.03.2021

Foydali resurslar