Farg‘ona viloyati Bag‘dod tumanida “Ayollar daftari”ga 2 ming 527 nafar xotin-qiz kiritilgan.

Ayni kunlarda ularni har tomonlama qo‘llab-quvvatlash, bandligini ta’minlash va qo‘shimcha daromad manbalarini yaratib berish choralari ko‘rilmoqda.

Navro‘z bayrami arafasida boquvchisini yo‘qotgan, nogironligi bo‘lgan va kam ta’minlangani sababli ro‘yxatga olingan 30 nafar fuqaroga tikuv mashinalari, yana 10 nafariga ikki boshdan qo‘y berildi.

“Samarqand” mahalla fuqarolar yig‘inida yashovchi Mahbubaxon Yo‘ldasheva bichish-tikishning hadisini olgan, ammo shu kungacha ro‘zg‘oridan orttirib tikuv mashinasini xarid qila olmayotgan edi. Unga subsidiya mablag‘lari hisobidan zamonaviy tikuv mashinasi topshirildi.

– Bayramda yaxshi sovg‘a bo‘ldi, – deydi quvonch bilan M.Yo‘ldasheva. – Anchadan beri oilamizga qo‘shimcha daromad keltirishni maqsad qilib yurgandim. Mana, bugun bu niyatim amalga oshdi. Endi yangi tikuv mashinasidan samarali foydalanib, ro‘zg‘orimni butlayman.

Mart oyining o‘zida tumanda 49 nafar ayolga zamonaviy tikuv mashinasi va 21 nafar ayolga ikki boshdan qo‘y berildi, 56 xotin-qizning esa bandligi ta’minlandi.