O‘zbekiston fermer, dehqon xo‘jaliklari va tomorqa yer egalari kengashi raisi A.Xaitov Xorazm viloyati Gurlan tumanida tashkil etilayotgan «Moxsut Manzura» tomorqa xizmati klasteri faoliyati bilan tanishdi.

Navro‘z bayrami arafasida faoliyati yo‘lga qo‘yilishi kutilayotgan mazkur tomorqa xizmati klasteriga jamg‘arma mablag‘lari hisobidan 500 million so‘m kredit yo‘naltirilgan. Shuningdek, issiqxona qurish uchun 1 gektar yer ajratib berildi.

Prezidentimizning 2020 yil 30 iyundagi «Aholi tomorqalaridan foydalanish samaradorligini oshirishning qo‘shimcha chora-tadbirlari to‘g‘risida»gi qarori bu boradagi ishlar rivojida muhim dasturilamal bo‘layotir.

Hozir jamiyatda belgilangan 12 ta yo‘nalishdan 7 tasi to‘liq yakunlanib, ish faoliyatini boshladi. Ixcham issiqxonalar qurish sexi, texnika parki, ko‘chatchilik issiqxonasi, urug‘, ko‘chat, o‘g‘it, kimyoviy vositalar sotish do‘koni shular sirasidan. Qolgan yo‘nalishlarda ham quriladigan ob’ektlarning to‘liq smeta loyihalari ishlanib, keng miqyosda qurilish ishlari olib borilmoqda.

O‘zbekiston fermer, dehqon xo‘jaliklari va tomorqa yer egalari kengashi raisi A.Xaitov Xorazm viloyatiga safari chog‘ida Bog‘ot va Yangibozor tumanida ham bo‘lib, yoshlar, fermerlar va tomorqa egalari bilan uchrashdi. Yangibozor tumanida 35 nafar yosh yigit-qizga fermer xo‘jaliklari 17 gektar yer ajratib berdi. Bu esa ishsiz yoshlarni ish o‘rinlari bilan ta’minlashga xizmat qilishi bilan ahamiyatli.

Bu yerlarga ishlov berish, undan samarali foydalanishni ta’minlash uchun tajribali fermerlar yoshlarga maslahat berib boradi. Mazkur maydonlarga sabzavot, poliz, dukkakli ekinlar yetishtirish va bog‘ yaratish mo‘ljallanmoqda.