Toshkent viloyati Bo‘stonliq tumanning Xumson qishlog‘i Ugom tizmasi g‘arbiy chekkasining janubiy-sharqiy yonbag‘irlarida, Ugam daryosi bo‘yida joylashgan bo‘lib, tabiati, o‘ziga xos takrorlanmas landshaftlari, iqlimi bilan ajralib turadi.

Bu yerda 3 mingdan ortiq aholi istiqomat qilayotgan bo‘lib, davlat xizmatlariga doimo ehtiyoj sezadi. Tuman markaziga biror hujjat bilan bog‘liq yumush uchun borib kelish, ayniqsa, qish-qirovli kunlari ancha  qiyinchilik tug‘diradi. Tabiiyki, aholi tog‘ sharoitida ancha masofa bosib, yo‘lga ko‘p vaqt sarflaydi.

Bo‘stonliq tumani Davlat xizmatlari markazi tomonidan aholiga sayyor xizmat ko‘rsatish uchun maxsus jihozlangan avtobus yordamida uzoq hududlarga chiqish amaliyoti bu kabi ovoragarchiliklarga chek qo‘ymoqda. Navbatdagi manzil Xumson qishlog‘i bo‘ldi. Joriy yil davomida chekka va olis hududlar, aholi gavjum bo‘lgan joylarda 250 ga yaqin sayyor xizmat ko‘rsatildi.

— Markaz xodimlarining o‘zi yashash manzillarimizga kelib sayyor tarzda davlat xizmatlarini ko‘rsatib kelmoqda, — deydi hududda yashovchi  G‘ilmon Abduraimov. — Davlat xizmatlari markazi mutaxassislari tezkor xizmat ko‘rsatishi orqali tashvishimizni yengillashtirdi. Yashab turgan uy-joyimizni kadastrdan o‘tkazish harakatida edim. Endi ancha masofa bosib tuman markaziga borishga hojat qolmadi. Anchadan beri o‘ylab yurgan muammomiz tezda hal bo‘ldi.  

Maxsus avtobusda mutaxassislar tomonidan mahallaning 15 nafar fuqarosiga tadbirkorlik sub’ektlarini davlat ro‘yxatidan o‘tkazish, elektr   tarmoqlariga ulanish, manzil-ma’lumot axborotlarini taqdim etish kabi davlat xizmatlari ko‘rsatildi.

Shuningdek, fuqarolarga davlat xizmatlari sohasiga oid yangiliklar, xizmat turlari, yangi qabul qilingan farmon va qarorlar mazmun-mohiyati to‘g‘risida ham tushunchalar berildi.