Наманган туманида аҳолини камбағалликдан чиқариш борасида амалий ишлар давом эттирилмоқда.

Хусусан, ушбу сектор ҳудудидаги 13 та МФЙда 454 нафар эҳтиёжманд оила рўйхати шакллантирилиб, уларга иш ўринлари яратиш бўйича олиб борилган чора-тадбирлар самарасида 529 нафар фуқаронинг бандлиги таъминланди.

Шунингдек, туман прокурори ташаббуси билан 429,2 миллиард сўм қийматидаги, 1782 та иш ўрни вужудга келадиган 73 та инвестицион лойиҳалардан 20 таси ишга туширилиб, 408 нафар кишининг ишсизлигига барҳам берилди. Мазкур лойиҳаларни ўз вақтида амалиётга киритиш, вужудга келтирилган иш ўринлари ҳаққонийлигини мунтазам кузатиб бориш мақсадида электрон дастур жорий қилинган.

Иш берувчилар билан ҳамкорликдаги саъй-ҳаракатлар натижасида эса 493 нафар ёшлар меҳнат бозорида ўз ўрнини топишга эришди.

Ҳудудда 236 та иссиқхона қурилиши аҳолининг молиявий аҳволи яхшиланишига замин ҳозирлади. Шунингдек, сектор ҳудудида тадбиркорликни ривожлантириш, оилаларда барқарор ижтимоий муҳитни яхшилаш, ажримлар сонини қисқартириш, аграр соҳадаги фаолият сифати ва самарадорлигини таъминлаш, касаначилик йўналишларида ҳам намунали ишлар бажарилмоқда.