Сурхондарё вилояти Ангор туманида аҳоли, хусусан ёшлар бандлигини таъминлаш борасида муайян ишлар олиб борилмоқда.

«Ангор Сурхон томорқа хизмати» масъулияти чекланган жамиятида ишсиз ёшларга ҳунар ўргатилади. Айни пайтда бу ерда 20 нафардан ортиқ ёшлар темирчилик сир-асрорларини ўрганмоқда. Шуни таъкидлаш жоизки, мазкур МЧЖ 2 нафар ишчи билан фаолият бошлаган бўлса, бугунга келиб 10 дан зиёд уюшмаган ёшлар бу ерда иш ўрнига эга бўлди.

– Туманимизда ижтимоий кўмакка муҳтож оилалар учун субсидия асосида бир сотихли иссиқхона қуриб берилмоқда, - дейди МЧЖ раҳбари Ойбек Каримов. –Айни вақтда жамоамиз билан ушбу иссиқхоналарни тайёрлаяпмиз. Бундан ташқари, хотин-қизларни иш билан таъминлаш мақсадида амалга оширилаётган лойиҳа бўйича гилам тўқиш дастгоҳини ҳозирлаш вазифасини ҳам зиммамизга олганмиз.

Ҳунарли бўлган ҳар бир ёшнинг бандлигини таъминлаш орқали мамлакат ривожига ҳисса қўшадиган ишбилармонлар сафини кенгайтириш мумкин. Бу борадаги ишлар давом этмоқда.