Ўзбекистон Қуролли Кучлари академиясида “Ватанпарварлик – миллий юксалиш кафолати“ шиори остида “Прокурор ва ёшлар учрашуви“ ташкил этилди.

Унда Тошкент шаҳар ҳарбий прокуратураси вакиллари, курсантлар, Ўзбекистон ёшлар иттифоқи фаоллари иштирок этди.

Тадбирда Қуролли Кучлар академияси бўйлаб экскурсия уюштирилиб, унда академия фаолияти, машғулот хоналарида ташкил этилган замонавий педагогик таълим тизими, моделлаштириш ва симуляция, ахборот-коммуникация технологиялари, курсантларнинг яшаш шароитлари ҳақида маълумот берилди.

Учрашувда курсантлардан ташкил топган фахрий қоровул взводининг қурол ҳамда қўл жанги намойиши, оркестр томонидан ижро этилган куй-қўшиқлар, кўргазмали чиқишлар иштирокчиларда яхши таассурот қолдирди.

Тадбир доирасида иштирокчилар Қуролли Кучлар академияси тарихи музейига саёҳат қилди. Тошкент олий умумқўшин қўмондонлик билим юрти (ҳозирда Қуролли Кучлар академияси) 1918 йил 12 июлда ташкил топган. 1941-1945 йилларда фашизмга қарши олиб борилган уруш даврида билим юртида 25 та битирув ўтказилиб, 8 мингдан ортиқ офицерлар тайёрланган.

Президентимизнинг 2017 йил 25 апрелдаги тегишли қарорига мувофиқ, Тошкент олий умумқўшин қўмондонлик билим юрти негизида янги Қуролли Кучлар академияси ташкил этилган.

Учрашувда иштирокчи ёшларга бугунги кундаги ислоҳотлар, ўзгаришлар, яратилаётган имкониятлар ҳақида маълумот берилди.