Қарши шаҳри аҳолисига тезкор, шаффоф ва қулай хизмат кўрсатувчи, замонавий, ўзига хос интерьер ва дизайнга эга Давлат хизматлари маркази фойдаланишга топширилди.

Айни пайтга қадар Қарши шаҳар давлат хизматлари маркази орқали 139 турдаги давлат хизматларидан 250 мингдан ортиқ жисмоний ва юридик шахс фойдаланган. Марказ ходимлари томонидан 2017-2020 йилларда 9 минг 208 та тадбиркорлик субъекти рўйхатдан ўтказилган. 

Давлат хизматлари маркази учун ажратилган умумий ер майдони 1 минг 800 квадрат метр бўлиб, бу республика миқёсидаги энг катта бинолардан ҳисобланади. Бинонинг ташқи кўриниши ҳам, унинг ички дизайни ҳам ўзгача услубда жиҳозланган.

Бино пештоқидаги бўйи 6 метр, эни 12 метрлик LED-экран узоқдан кўзга ташланади. Бинода давлат хизматлари кўрсатиш учун барча зарур шароит яратилган. Жумладан, 48 та хизмат кўрсатиш ойнаси, ўз-ўзига хизмат кўрсатиш хоналари ва инфокиосклар, электрон аукционда иштирок этиш учун алоҳида хоналар, электрон навбат тизими, инвесторлар ва маҳаллий тадбиркорлар билан бизнес-учрашувлар ўтказишга мўлжалланган инвесторлар хонаси, анжуман ва семинарлар учун конференцзал ва, албатта, кутубхона ҳамда болалар майдончаси ҳам жой олган.

Кўрсатилган барча хизматлар тўловини амалга ошириш учун банк кассалари мавжуд, нақд пул ечиш учун банкоматлар қўйилган. Мобиль телефонлар қувват олиши учун қурилмалар ҳам ўрнатилган. Бинода бепул wi-fi тармоғи ёқилган бўлиб, ундан марказга ташриф буюрган фуқаролар беминнат фойдаланиш имконига эга. Йилнинг тўрт фаслида ҳам бир хил микроиқлим туҳфа этувчи манзара ҳеч кимни бефарқ қолдирмайди. Ноёб гуллар манзараси бир-бирини такрорламайди.

Шу ернинг ўзида нотариус, адлия ва ФҲДЁ бўлимлари, суғурта ташкилоти филиаллари ҳам жойлашган. Кўпчилик кутган хизмат тури, янги намунадаги ҳайдовчилик гувоҳномасини энди марказда жойлашган ЙҲХБ бўлимининг махсус хонасидан олиш мумкин.

Шунингдек, Президент Халқ қабулхонаси ва Бош вазир қабулхонаси ҳам Давлат хизматлари маркази билан ёнма-ён фаолият кўрсатади.

Фуқаролар бу ерда бепул асосда юридик маслаҳат берувчи “Мадад” хуқуқий маслаҳат бюроси хизматидан ҳам фойдаланиши мумкин.

Марказда Давлат хизматлари агентлиги ва Бирлашган Миллатлар Ташкилоти Тараққиёт дастури ҳамда Европа ҳамжамияти ҳамкорлиги томонидан юртимизда амалга оширилаётган “Ўзбекистоннинг қишлоқ жойларида давлат хизматлари тақдим этишни такомиллаштириш ва бошқарув даражасини ошириш” қўшма лойиҳаси иштирокчи ва мутахассислари учун ҳам хона ажратилган.

Бинонинг тантанали очилиш маросимида вилоят ҳокими З.Мирзаев иштирок этди.