Самарқанд давлат университетидаги Ўзбекистон ёшлар иттифоқи бошланғич ташкилоти етакчилари ҳамда бир гуруҳ фаол талабалар Қорақалпоғистоннинг Мўйноқ туманида бўлиб, Оролнинг қуриган қисмида ўрмон ташкил этиш жараёнида иштирок этди.

– Аввало, Мўйноқ туманида кейинги йилларда амалга оширилган ўзгаришлар, бунёдкорлик ишлари билан танишдик, – дейди университет ёшлари етакчиси Ҳусан Тўхтаев. – Бу янгиланишлар жараёнида ёшлар учун ҳам кенг имконият, шарт-шароит яратилганига гувоҳ бўлдик. Сафаримиздан асосий мақсад эса Орол денгизи ўрнида пайдо бўлган Оролқумда саксовул экиш ишларида иштирок этиш эди ва бу эзгу ташаббусда қатнашганимиздан фахрланамиз.

Университет ёшлари Оролқум бағрида 2 гектар майдонда саксовул экиб, ҳудудда экологик барқарорликни таъминлашга ҳисса қўшди.

Самарқанд давлат университети профессор-ўқитувчилари, биология ва география факультетлари талабаларидан иборат катта гуруҳ 2019 йилда ҳам Оролбўйига бориб, илмий изланишлар ўтказганди, ҳудудда ўрмон барпо этишда қатнашган эди.