Ўзбекистон Бадиий академиясида Камолиддин Беҳзод номидаги Миллий рассомлик ва дизайн институти ректори билан ёшларнинг учрашуви бўлди.

Институт ректори Н.Сайфуллаев Президентимиз Шавкат Мирзиёевнинг Олий Мажлисга Мурожаатномаси ёшлар ҳаётида туб бурилиш ясаши, уларнинг иқтидорини ривожлантириш, истеъдодли ўғил-қизларни қўллаб-қувватлаш, ижтимоий-сиёсий фаоллигини ошириш, ҳуқуқий онгини юксалтиришда муҳум аҳамиятга эга эканлигини таъкидлади.

Институт мамлакатимиздаги тасвирий ва амалий санъат, дизайн ва санъатшунослик соҳаларида олий маълумотли, етук малакали мутахассис кадрлар тайёрлайдиган ягона етакчи таълим муассасаси ҳисобланади. Ҳозир институтда талабалар бакалавриат босқичида 23, магистратура босқичида 13 йўналиш бўйича таҳсил олаяпти. Институт талабалари турли халқаро ва республика миқёсида ўтказилаётган фестиваллар, танлов-кўргазмалар, фан олимпиадаларида мунтазам иштирок этиб, юқори ўринларни эгаллаб келмоқда.

– Президентимиз ҳар бир чиқишида ёшларга кенг йўл очиш, илм-маърифат эгаллашимиз учун муносиб шароит яратиш лозимлиги ҳақида гапиради, – дейди биринчи курс талабаси Моҳигул Собирова. – Бугунги учрашувда институт миқёсида талабалар ўртасида “Энг яхши мўйқалам соҳиби”, “Энг зўр мусаввир”, “Энг маҳоратли дизайнер” каби танловларни мунтазам ўтказиш таклифини билдирдим. Бу каби танловлар бизнинг иқтидоримизни янада намоён этишга, ўз устимизда ишлашга рағбат бўлади.