Қашқадарё вилояти давлат солиқ бошқармаси бошлиғи,IV сектор раҳбари Азамат Бозоров Низомий номидаги Тошкент педагогика институтининг Шаҳрисабз филиали талаба ёшлари билан учрашди.

Сектор раҳбари учрашувда Президентимизнинг 2019 йил 27 декабрь куни Муҳаммад ал-Хоразмий номидаги мактабда ёшлар билан учрашувида белгилаб берилган вазифалардан келиб чиқиб, ҳудуддаги ёшлар ташаббускорлигини ошириш, таклиф ва муаммоларини ўрганиш, уларни ҳал этиш масалаларига эътибор қаратди.

–Мен олийгоҳ кутубхонаси китоб захира базасини бойитишда амалий ёрдам сўраб мурожаат қилдим, - дейди талаба Меҳрангиз Сафаралиева. – Сектор раҳбари бу таклифимни қўллаб-қувватладилар. Бундан жуда хурсанд бўлдим.

Очиқ, самимий руҳда ўтган учрашувда талаба ёшлар томонидан кўтарилган масалалар, ташаббус ва таклифлар, уларни қизиқтирган саволлар тингланиб, уларнинг ечими муҳокама қилинди.

Учрашувдан сўнг ёшлар Шаҳрисабз шаҳридаги “Садо” масъулияти чекланган жамиятида бўлиб, корхонанинг ишлаб чиқариш жараёни билан яқиндан танишдилар.