Оҳангарон туманида Тошкент вилояти тўртинчи сектори, давлат солиқ бошқармаси бошлиғи А.Қурбонов сайёр қабул ўтказди.

Аҳолининг турмуш тарзи билан яқиндан танишиш, уларни қийнаётган муаммоларни ўрганиш ва уларга ўз вақтида ечим топиш, фуқароларнинг турмушини янада яхшилаш мақсадида вилоят сектор раҳбарлари томонидан ҳудудларда мунтазам сайёр қабуллар ўтказилмоқда.

Аҳоли билан ана шундай бевосита мулоқотларнинг навбатдагиси туман марказидан 100 километр узоқликда жойлашган тоғли “Кўксарой“ маҳалла фуқаролар йиғинининг Эртошсой ва Кўксарой қишлоғида ташкил этилди.

Сайёр қабулда вилоят ва туман секторлари, бошқарма ва ташкилот масъуллари, қишлоқ аҳолиси иштирок этди.

Тўртинчи сектор раҳбарининг сайёр қабули одатдаги тартибдан бироз ўзгача, мактабларга ташриф билан бошланди. А.Қурбонов таълим муассасаларининг куз-қиш мавсумига тайёрлиги, иситиш тизимининг созлиги ҳамда мавжуд кўмир захиралари билан танишди. Шунингдек, мактаб битирувчи синф ўқувчилари билан суҳбатлашиб, келгусида тадбиркорлик фаолияти билан шуғулланиш истагида бўлган ўқувчиларга зарур тавсиялар берди.

Шундан сўнг сектор раҳбари бошчилигидаги мутасаддилар қишлоқ аҳолиси мурожаатлари билан яқиндан танишди.

Мазкур қишлоқлар тоғли ҳудудда жойлашганлиги боис, аксарият мурожаатлар газ таъминоти ва кўмир захираси билан боғлиқ бўлди. Шундан келиб чиқиб, сектор раҳбари томонидан туман давлат солиқ инспекцияси, ички ишлар бўлими ва туман газ таъминоти корхонаси раҳбарларига тегишли вазифалар юклатилиб, шу ернинг ўзида 180 та хонадонга газ баллонлари ҳамда кўмир етказиб берилди.

Сайёр қабулда аҳолининг куз-қиш мавсумига тайёргарлик, кадастр ҳужжатлари, симёғочларни алмаштириш, бандлик, йўлларга асфальт ётқизиш каби масалалар бўйича 180 дан ортиқ мурожаати тингланиб, 170 дан ортиғи шу жойнинг ўзида ижобий ҳал этилди. 9 нафар фуқаронинг муаммоли мурожаати тегишли ташкилотларга йўналтирилиб, ижроси назоратга олинди.