Навоий шаҳрида давлатимиз мустақиллигининг 28 йиллиги арафасида 216 хонадондан иборат 7 қаватли тураржой биноси фойдаланишга топширилди.

Бугун республикамизнинг барча ҳудудларида улкан бунёдкорлик ишлари олиб борилмоқда. Хусусан, Навоий вилоятида ҳам кенг кўламли қурилишлар давом этмоқда. Истиқлол шукуҳи кезиб юрган мана шундай қутлуғ кунларда вилоятнинг туман ва шаҳарларида ўнлаб ижтимоий соҳа объектлари, тураржойлар фойдаланишга топширилмоқда.

Жорий йилда Навоий вилоятида ижтимоий ҳимояга муҳтож мингдан ортиқ оилалар учун тураржойлар бунёд этилган бўлса, Навоий шаҳрида 400 га яқин шинам хонадонлар фойдаланишга топширилди. Шунингдек, шаҳарда хусусий тадбиркорлик субъектлари томонидан бугунга қадар 480 хонадонли кўп қаватли уйлар қурилиши олиб борилаётгани аҳолининг уй-жой билан боғлиқ эҳтиёжларини қаноатлантиришга хизмат қилмоқда.

Қисқа муддатда “ZARAFSHON GOLDEN GROUP” компанияси томонидан 17 миллиард 100 миллион сўмдан ортиқ маблағ эвазига бунёд этилган тураржой мажмуасида 216 та оиланинг истиқомат қилиши учун барча имконият яратилган. Биринчи қаватда 16 та савдо ва маиший хизмат кўрсатиш шохобчаси, ҳовлисида болалар майдончалари, ҳордиқ учун айвончалар ва ўриндиқларнинг янгича дизайн билан ўрнатилгани ҳар қандай кишининг кўзини қувнатади.

Турар жой мажмуасининг очилиш маросимида вилоят ҳокими Қ.Турсунов сўзга чиқди.

Нуриддин РАҲИМОВ, ЎзА