2017-2021 йилларда Ўзбекистон Республикасини ривожлантиришнинг бешта устувор йўналиши бўйича ҳаракатлар стратегияси
Эркинжон Турдимов қабулда судлар фаолиятига тааллуқли мурожаатларни нега қабул қилмади?

Самарқанд вилояти ҳокими Эркинжон Турдимовнинг Тойлоқ туманида ўтказган сайёр қабулида ушбу туман аҳолиси билан бирга Самарқанд шаҳри, Ургут, Самарқанд, Жомбой туманларидан фуқаролар иштирок этди.

Таъкидлаш лозимки, аҳоли билан бевосита мулоқот қилиш ҳамда юзага келаётган муаммоларга жойида ечим топиш мақсадида ўтказилаётган шу каби сайёр қабулларда вилоят ҳокими билан бирга вилоятдаги ижро ҳокимияти идоралари ва ҳуқуқ-тартибот органлари раҳбарлари, судлар раислари ва бошқа мутасаддилар иштирок этмоқда. Бу эса ҳар бир масалани ўша жойнинг ўзида муҳокама қилиш ва муаммога ечим топишга хизмат қилмоқда. Аммо, мурожаатчилар орасида буни нотўғри талқин қилаётганлар ҳам учрамоқда. 

Тойлоқдаги қабулда ҳам фуқаролардан бири суд қароридан норози бўлиб вилоят ҳокимига мурожаат қилди. Э.Турдимов эса ушбу фуқаро мисолида судлар фаолияти билан боғлиқ масалада келган бошқа мурожаатчиларига ҳам юзланиб шундай деди:

– Ўзбекистон Республикаси Конституциясига кўра, судьялар мустақилдирлар, фақат қонунга бўйсунадилар. Судьяларнинг одил судловни амалга ошириш борасидаги фаолиятига бирон-бир тарзда аралашишга йўл қўйилмайди ва бундай аралашиш қонунга мувофиқ жавобгарликка сабаб бўлади.

Вилоят ҳокими бўлсам-да мен ҳам қонундан ташқари иш юритолмайман. Суд қароридан норози бўлсангиз, белгиланган тартибда юқори турувчи суд идораларига мурожаат қилинг. 

image_2019-07-02_18-54-29.png

Яна бир жиҳат, кейинги сайёр қабулларда кузатилаётган ва рад жавоби берилаётган бўлса-да айрим шахсларнинг боқимандалик кайфиятидаги мурожаатларига жавобан уларга томорқадан самарали фойдаланиш, ишга жойлашиш ёки оилавий тадбиркорлик билан шуғулланиш таклиф этилиб, шу каби йўналишларда кўмак берилиши тушунтирилмоқда. Яъни, эҳтиёжманд одамга балиқ эмас, қармоқ таклиф этилмоқда.

Бу галги қабул чоғида ҳам ушбу тоифадаги шахслар ана шундай жавоб олди.

Лекин ҳақиқатдан ҳам долзарб бўлган, узоқ вақтдан буён ечими топилмаётган, айрим раҳбарларнинг эътиборсизлиги туфайли ўз ҳолига ташлаб қўйилган масалаларга шу ернинг ўзида ечим топилди. Ўрганилиши талаб этиладиган мурожаатлар юзасидан муддат белгиланди.

Умуман, Э.Турдимовнинг Тойлоқдаги сайёр қабулида 210 дан зиёд мурожаат қайд этилиб, уларнинг бажарилиши назоратга олинди.

Ғ.ҲАСАНОВ, ЎзА

Фойдали ресурслар