Тошкент вилояти Нурафшон шаҳрида ички ишлар вазирининг биринчи ўринбосари, генерал-майор Даврон Назармуҳамедовнинг навбатдаги сайёр қабули ўтказилди.

илоят ички ишлар бошқармаси, маҳаллий ҳокимликлар масъуллари, туман ва шаҳар ички ишлар бўлимлари бошлиқлари, тегишли ташкилотлар раҳбарлари иштирок этган сайёр қабулда Нурафшон шаҳри, Оққўрғон ва Чиноз туманлари фуқароларининг ички ишлар органлари билан боғлиқ мурожаатлари тингланди.

Сайёр мулоқотда мазкур ҳудуд фуқароларининг ички ишлар органларига ишга жойлашиш, ишга қайта тиклаш, ушбу йўналишда таълим олиш, суриштирув ва тергов ҳаракатлари, паспорт, фуқаролик ва пенсия каби масалаларга оид 60 дан ортиқ мурожаати ўрганилиб, аксарияти жойида ҳал этилди.

– Орган соҳасида ишлаш орзу-ҳаёли билан улғайдим, – дейди оққўрғонлик Мавлон Исабоев. – Оилавий шароит сабаб ўқий олмадим. Лекин тизимда ишлаш истагидан бир зум ҳам чекинмадим. Орзуйимга етиш йўлида ҳарбий хизматни ўтаб қайтдим. Ҳозирда мавсумий ишлар билан бандман. Сайёр қабулда профилактика инспекторининг ёрдамчиси лавозимига ишга жойлаштиришларини сўраб мурожаат қилдим. Танловимни қўллаб-қувватлашганидан жуда хурсанд бўлдим.

Сайёр қабулда шунингдек, фуқароларнинг бошқа соҳаларга оид мурожаатлари ҳам тингланиб, уларга зарур ҳуқуқий тушунтириш ва тавсиялар берилди. Ижроси маълум вақт талаб этадиган мурожаатлар бўйича тегишли масъулларга топшириқ берилиб, ижроси назоратга олинди.

А.Худойқулов, ЎзА