Сирдарё вилояти ҳокими вазифасини бажарувчи Эркинжон Турдимов саноат ривожи ва хусусий сектор салоҳияти билан танишиш мақсадида Сирдарё туманига ташриф буюрди.

Вилоят ҳокими тумандаги бир қатор йирик ва кичик тадбиркорлик субъектларида бўлиб, уларнинг фаолият йўналишлари, жорий иш режалари ҳамда ишлаб чиқараётган маҳсулотлари билан танишди.

Юк ва йўловчи ташишга мўлжалланган транспорт воситаларини тайёрлашга ихтисослашган “Асака Моторс” автозаводида етти ўринли “WULING N111” русумли автомобилларни йиғиш жараёнларини кўздан кечирди. Корхона ходимлари билан мулоқот чоғида ишлаб чиқариш қувватларини ошириш, янги моделларни жорий этиш ва бозорда рақобатбардошликни кучайтириш масалалари муҳокама қилинди.

Шунингдек, Европа технологиялари асосида қурилган ва энергия тежовчи газобетон материаллар ишлаб чиқаришга ихтисослашган “Эурасиа Газ Бетон” заводида қурилиш соҳаси учун муҳим бўлган маҳсулотлар турлари, уларнинг сифат кўрсаткичлари ва етказиб бериш механизмлари юзасидан суҳбатлашди.

Фармацевтика маҳсулотлари ишлаб чиқарадиган “Ривер-Мед” корхонасида эса антибиотиклар, таблеткалар, ампула ҳамда инфузион дори воситаларини халқаро санитар талабларга мувофиқ тарзда тайёрлаш жараёнлари ўрганилди. Бундан ташқари, янги иш ўринлари яратиш, маҳаллий аҳоли бандлигини таъминлаш ва маҳсулотларни экспортга чиқариш имкониятлари муҳокама этилди.

Ташриф чоғида тадбиркорлар билан самарали мулоқотлар ўтказилди. Суҳбатлар давомида маҳсулот турларини диверсификация қилиш, юқори технологияларни жорий этиш, инфратузилмани ривожлантириш ҳамда давлат томонидан тақдим этилаётган имкониятлардан самарали фойдаланиш масалалари атрофлича кўриб чиқилди. Тадбиркорлар эса янги инвестиция лойиҳалари ва ҳамкорлик ташаббусларини илгари сурди.

Вилоят раҳбари ушбу ташрифнинг асосий мақсади маҳаллий ишбилармонларни қўллаб-қувватлаш, уларнинг муаммоларига жойида ечим топиш ҳамда Сирдарё туманида тадбиркорлик муҳитини янада яхшилаш эканини таъкидлади.