Жорий йилнинг 19 март куни Президентимизнинг кичик ва ўрта бизнес вакиллари билан учрашувида ушбу соҳа ривожи йўлида бизнес эгалари учун алоҳида енгилликлар ва имкониятлар берилиши ҳамда уларнинг муаммоларини ҳал этиш мақсадида жойларда раҳбарлар билан юзма-юз учрашувлар ташкил этилиш белгиланган эди.

Шунга мувофиқ, Бухоро вилоятининг Когон шаҳрида солиқ бошқармаси бошлиғи томонидан тадбиркорларнинг ҳуқуқ ва қонуний манфаатларини ҳимоя қилиш ҳамда уларнинг барқарор ривожланишига кўмаклашиш мақсадида кичик ва ўрта бизнес вакиллари билан очиқ мулоқотлар ташкил этилди ва унда 40 га яқин бизнес вакиллари ҳамда соҳага дахлдор масъуллар иштирок этди.

Учрашувда дастлаб Президентимизнинг “Кичик ва ўрта бизнеснинг иқтисодиётдаги ўрнини ошириш чора-тадбирлари тўғрисида”ги фармони мазмун-моҳияти ва тармоқ вакилларига берилган енгилликлар тушунтирилди.

Юртимиздаги барча ҳудудлар ўзига хос географик, демографик, иқтисодий ва ижтимоий хусусиятларга эга. Шу жиҳатдан Когон шаҳри тадбиркорлик фаолияти учун барча шароитлар етарли бўлган жуда қулай манзиллардан бири ҳисобланади. 

Бугунги кунда ушбу ҳудудда 800 га яқин турли йўналишлардаги тадбиркорлик субъектлари барқарор фаолият юритмоқда. Эътиборлиси, уларнинг 500 дан ортиғини кичик ва ўрта бизнес вакиллари ташкил этади. 

Очиқ мулоқотда тадбиркорлик фаолияти иқтисодиётимизни ривожлантириш ҳамда аҳоли фаровонлигини оширишда тобора муҳим ўрин эгаллаётгани тушунтирилди ва босқичма-босқич ўз бизнесини кенгайтириш ниятидаги ишбилармонларнинг лойиҳалари билан танишилди. Бундан ташқари, айрим кичик тадбиркорларга фаолиятини ўрта бизнесга ўтказиш ҳамда ўрта тармоқдаги ишбилармонларга эса бизнесини янада кенгайтириш юзасидан ҳудуднинг ижтимоий-иқтисодий ривожлантириш йўл хариталарига мос таклифлар берилди.

Тадбир якунида солиқ қонунчилиги талабларига тўлиқ амал қилишдаги ибратли фаолият билан ўрнак бўлаётган бир гуруҳ тадбиркорларга ташаккурномалар билдирилди.