Бош вазир ўринбосари – Оила ва хотин-қизлар қўмитаси раиси Зулайҳо Маҳкамова иштирокида “Темурбеклар мактаби“да “Янги Ўзбекистоннинг шижоатли қизлари” шиори остида “Раҳбар аёл ва ёшлар учрашуви” ўтказилди.

Миллий гвардия тизимидаги олий ҳарбий таълим муассасалари курсантлари, лицей ҳамда мактаблар ўқувчи-қизлари қатнашган учрашувда бугунги кунда хотин-қизларни ҳар томонлама қўллаб-қувватлашга оид норматив-ҳуқуқий ҳужжатлар мазмуни, яратилаётган шароитлар ва имкониятлар, ислоҳотларнинг амалий натижалари ҳақида батафсил маълумот берилди.

Таъкидланганидек, кейинги йилларда мамлакатимизда аёл-қизларни ҳар томонлама қўллаб-қувватлаш, касб-ҳунарли қилиш, бандлигини таъминлаш, уларнинг жамиятимиз ҳаётидаги ижтимоий-сиёсий фаоллигини ошириш, турли соҳаларда ўз қобилият ва имкониятларини рўёбга чиқариши учун шароитлар яратиш устувор вазифага айланди.

Барча соҳаларда бўлгани каби Миллий гвардия тизимида ҳам оила ва хотин-қизларни ҳар томонлама қўллаб-қувватлашга алоҳида эътибор қаратилмоқда. Хусусан, давлатимиз раҳбарининг 2023 йилдаги тегишли қарорига мувофиқ 2024 йилдан бошлаб, Миллий гвардия Тошкент “Темурбеклар мактаби” ҳарбий-академик лицейига қиз болалар ҳам қабул қилиниши бошланган ва ҳозирда 27 нафар ўқувчи-қиз таҳсил олмоқда.

Юртимизда хотин-қизлар ва болалар ҳуқуқлари, эркинликлари ҳамда қонуний манфаатларини ишончли ҳимоя қилишнинг ҳуқуқий асослари тубдан такомиллаштирилмоқда.

Бу борада Ўзбекистон Республикаси Миллий гвардияси, Соғлиқни сақлаш вазирлиги ҳамда Оила ва хотин-қизлар қўмитаси ўртасида ўзаро ҳамкорлик Меморандуми имзоланган.

Ўтказилган тадбир ҳам мазкур Меморандум доирасида бўлиб, тизимнинг ижодкор қизлари томонидан ўтказилган мушоира билан қизғин кечди.

Интерфаол тарзда ташкил этилган учрашув савол- жавобларга бой ўтиб, қизлар раҳбар аёл бўлишнинг масъулияти ҳамда шарафи ҳақида таассуротларга эга бўлди.

Суҳбат сўнгида бу каби тадбирларни мунтазам ўтказишга келишиб олинди. Меҳмонлар “Темурбеклар мактаби” ҳудудига эзгу ниятлар билан дарахт кўчатлари ўтқазди.