Жиззах вилоятида фуқароларнинг суд-ҳуқуқ соҳасидаги мурожаатларига самарали ечим топиш мақсадида Ўзбекистон

Республикаси Олий суди раисининг ўринбосари Шуҳрат Полвонов бошчилигидаги ишчи гуруҳ иштирокида оммавий сайёр қабуллар ташкил этилиб, унда 96 нафар фуқаронинг мурожаатлари тингланди.  

Жами 96 та мурожаатдан 46 та мурожаатга ҳуқуқий тушунтириш берилган бўлса, 43 та мурожаат қаноатлантирилди, 7 та мурожаат бўйича берилган ариза, илтимоснома ва тафтиш тартибидаги шикоятлар Олий суд томонидан ўрганиш учун қабул қилинди.

Шунингдек, жиноят ишлари бўйича судлар томонидан тақдимномалар асосида 22 нафар маҳкум ўталмай қолган ахлоқ тузатиш ишлари ва бошқа жазолардан муддатидан аввал шартли равишда озод қилинди.

Бундан ташқари, фуқаролик ишлари бўйича судлар томонидан 6 нафар фуқаронинг вояга етмаган фарзандлари таъминоти учун алимент ундириш ҳақидаги аризалари қаноатлантирилди.

Фуқаролик ишлари бўйича судлар томонидан 13 нафар шахснинг суд буйруғига нисбатан ёзган эътирозномаси сайёр қабул жараёнида қабул қилиниб, суд буйруғи бекор қилиниб, фуқаронинг мурожаати ижобий ҳал этилди. 1 нафар фуқаронинг ҳал қилув қарори ижросини кечиктириш ҳақидаги аризаси қаноатлантирилди. 2 нафар фуқаронинг ишлаганлик факти белгиланди.

Шунингдек, 5 та иқтисодий ишлар бўйича тадбиркорлик фойдасига даъво талаблари қаноатлантирилиб, улар ҳисобига 728 миллион 559 минг 945 сўм қарздорлик ундириб берилди.