Термизда ногиронлиги бор шахсларга қулай ва тўсиқсиз муҳит яратиш масаласига бағишланган йиғилиш бўлиб ўтди.

Сурхондарё вилояти ҳокимининг масалага алоқадор ўринбосарлари, вилоят қурилиш ва уй-жой коммунал, ички ишлар бошқармалари, экспертиза, буюртмачи, лойиҳачи ва қурилиш ташкилотлари раҳбарлари иштирок этган тадбирда Ижтимоий ҳимоя миллий агентлиги ижтимоий инспекцияси бошлиғининг биринчи ўринбосари Баҳодир Нишонов ногиронлиги бор шахсларга қулай ва тўсиқсиз муҳит яратиш юзасидан  лойиҳалар тақдимотини ўтказди.  

Тақдимотда йирик аҳоли пунктларининг асосий автомобиль йўлларидаги пиёдалар йўлакчаларида ногиронлиги бўлган шахслар учун зарур шароитларни яратиш, қулай пандуслар барпо этиш, кўзи ожиз ва заиф кўрувчи шахслар учун овозли светофор ўрнатиб, сариқ рангли йўлакчалар ташкил этиш ва тўсиқсиз муҳит яратишнинг самарали йўллари билан таништирди. Вилоятдаги ижтимоий соҳа объектларида бу ишларни сифатли йўлга қўйиш ҳақидаги фикр-мулоҳазалар тингланди. Жорий йилга мўлжалланган  режалари муҳокама этилди.

Термиз шаҳрида кўзи ожиз ва заиф кўрувчи шахслар учун овозли светофорлар, пиёдалар йўлида сариқ рангли йўлакчалар ташкил этишга эътибор кучайтирилмоқда. Жумладан, ўтган йил вилоят марказидаги Алишер Навоий кўчаси танлаб олиниб, тегишли ҳудудларида сариқ рангли йўлакчалар барпо этилди. Ҳозир ҳудуддаги чорраҳаларга 8 та овозли светофор жойлаштириляпти.

Жорий йил Ат-Термизий кўчасида ногиронлиги бор шахслар ҳаракатланиши учун барча шароит яратилаётир. Шунингдек, кўп қаватли уйларнинг йўлаклари ва лифтлари кўзи ожиз шахслар учун мослаштирилмоқда. Давлат ташкилотларининг кириш қисмларида сариқ йўлаклар ва брайл алифбоси мосламаси кўрсаткичли бино хариталари ташкил этилмоқда.  

Вилоят  ҳокими  Улуғбек Қосимов иштирок этган йиғилишда жорий йил воҳадаги туман марказлари ва йирик аҳоли пунктларида ҳам  ногиронлиги бўлган шахслар эркин ҳаракатланиши учун тўсиқсиз, қулай муҳит яратиш бўйича тегишли вазифалар белгилаб олинди.