Наманган вилояти ҳокими Шавкат Абдураззоқов бошчилигидаги сектор раҳбарлари ёш тиббиёт ходимлари билан учрашди.

Республика шошилинч тиббий ёрдам илмий маркази Наманган филиалида кечган мулоқотда вилоятда фаолият кўрсатаётган 200 нафардан ортиқ ёш тиббиётчи ва шу соҳада таҳсил олаётган талабалар иштирок этди.  

Дастлаб аҳолига кўрсатилаётган тиббий хизмат сифати ва самарадорлигини ошириш борасида олиб борилаётган саъй-ҳаракатлар, соҳа ишини янада ривожлантириш истиқболлари ва жорий йилда йўлга қўйилган амалиётлар ҳамда ёш кадрлар илгари сураётган лойиҳалар тақдимоти билан танишилди.  

Вилоят раҳбари мулоқот давомида соғлиқни сақлаш соҳасида амалга оширилаётган ислоҳотлар, айниқса тиббий муассасаларнинг моддий-техник имкониятларини ривожлантириш борасидаги хайрли ишлар, хорижлик ҳамкорлар билан рўёбга чиқарилиши кўзда тутилаётган янги лойиҳалар ҳақида тўхталиб ўтди. Ёш тиббиётчилар ўз таклиф-мулоҳазалари билан ўртоқлашдилар.