Ўрта Чирчиқ ва Юқори Чирчиқ туманларида сув таъминоти, оқова сув хизмати даражасини янада яхшилаш бўйича сайёр қабул ўтказилди. Унда “Тошкент вилояти сув таъминоти” АЖ мутахассислари, жойлардаги масъул раҳбар-ходимлар ҳамда ҳамкор ташкилот мутасаддилари иштирок этди.

Ўтган давр мобайнида ташкилотга аҳолини қийнаб келаётган сув таъминоти ва оқова сув хизмати тизимидаги масалалар юзасидан муаммолар бўйича юзлаб мурожаатлар келиб тушган. Хусусан, оқова сув тармоғига уланиш, ичимлик суви таъминотидаги узилишлар, мавжуд қарздорлик масаласи ва ичимлик суви ҳисоблагичини расмийлаштириш каби ҳолатларга асосий эътибор қаратилди.  

Мутахассисларнинг таъкидлашича, мазкур туманларда “Обод маҳалла” дастури бўйича ичимлик суви тармоғи тортилиши бошланган кўчалар кўп. Аммо хонадони ҳали тармоққа уланмаганидан норози бўлаётган мурожаатлар ҳам бор.  

– Маҳалламизга ичимлик суви тармоғи тортилишидан жуда хурсанд бўлгандик, – дейди “Т.Хван” маҳалла фуқаролар йиғинида яшовчи Раҳимбой Юнусов. – Бироқ қолган ишга қор ёғар, деганлари рост экан. Ҳудудимизда бошланган хайрли ишнинг чала қолганидан оддий аҳоли жабр кўрмоқда. Янги ичимлик суви тармоғидан кимдир хонадонига уланган, кимдир эса йўқ. Тармоқ совуқ кунлари яхши ишламайди. Кўпчилик сув трубалари яроқсиз ҳолатда эканидан норози. Оқова сув тизими ҳам тайинли ишламайди.  

Тадбир давомида масъуллар томонидан барча мурожаатлар махсус назорат режага киритилиб, белгиланган муддатдан кечиктирмай ўрганилиши юзасидан ходимларга тегишли топшириқлар берилди. Маълумотларга кўра, ҳозир Тошкент вилоятидаги маҳалла фуқаролар йиғинларининг 831 таси қисман ичимлик суви билан таъминланган.  

Жорий йил бошидан бери ўтказилган хатлов натижаларига кўра, вилоят аҳолисининг марказлашган ичимлик сув билан таъминланганлик даражаси 79,4 фоизни ташкил этади, қолган 20,6 фоиз аҳоли ичимлик сувини бошқа манбалар орқали истеъмол қилади. Жамиятнинг шаҳар ва туман филиаллари тасарруфида бўлган 180 та насос ва 2 минг 372 километр ичимлик суви тармоқлари таъмирталаб ҳолатда.