Фарғона вилояти ҳокими Хайрулло Бозоров вилоят болалар кўп тармоқли тиббиёт марказида бўлиб, онкогематология, кардиохирургия, нейрохирургия ва чақалоқлар хирургияси бўлимларида даволанаётган 48 нафар бола ва уларнинг оналарини Янги йил билан табриклади, байрам совғаларини топширди.

Вилоят раҳбари болалар ва уларнинг оналарига далда берди, тезроқ соғайиб кетишларини тилади.

Давлатимиз раҳбарининг оналик ва болаликни муҳофаза қилишга бўлган алоҳида эътибори натижасида ва қарорлари ижроси доирасида барпо этилган, бир йил аввал – 2022 йил 27 декабрда фойлаланишга топширилган 3 қаватли онкогематология, кардиохирургия, нейрохирургия ва чақалоқлар хирургияси бўлимлари биноси энг илғор хорижий жиҳозлар билан таъминланиб, бемор болалар ва уларнинг ота-онаси учун барча шарт-шароитлар яратилган.

Болаларнинг даволаниши билан бирга таълим-тарбияси ҳам эътиборда. Бу ерда “Замин” фонди томонидан ташкил этилган “Меҳрли мактаб” ва “Илк қадам” номли мактаб ва боғча гўшаларида болалар билим олиб, қизиқарли машғулотлар ўтмоқда.