Наманган вилояти ҳокими Шавкат Абдураззоқов Мингбулоқ туманида бўлиб, Қизилқум маҳалласида «Обод кўча, обод хонадон» дастури асосида амалга оширилаётган ишлар билан яқиндан танишди.

Дастур ижроси доирасида ҳудудда кенг кўламли бунёдкорлик ишлари амалга оширилаётган бўлиб, ҳозирга қадар 2,5 миллиард сўмлик 13,7 километр тоза ичимлик суви тармоғи тортилди, 393 хонадонга сув ҳисоблагичлар ўрнатилди. Шунингдек, 2023 йил биринчи ярмида сув иншоотлари тўла таъмирланди. Электр таъминотини яхшилаш мақсадида жойларга бетон таянч устунлар ва 1 та трансформатор ўрнатилди. 3,7 километр электр тармоқ, 1 та трансформатор мукаммал таъмирланди. Шу билан бирга, 168 та аҳоли хонадонида газ жиҳозлари жорий таъмирланди. Мослаштирилган ҳудуд бўлганлиги сабабли 1,2 километр газ тармоғи демонтаж қилинди. Жами 3 километр узунликда оптик толали алоқа тармоғи тортилиши эвазига 40 та хонадон интернет хизматига уланди.  

Айни пайтда маҳалланинг 9,5 километр ички қисми тўлиқ асфальтланмоқда.  

- Барча кўчалар асфальтланади, - деди вилоят раҳбари аҳоли билан мулоқот чоғида. - Маҳалла учун янги бино, спорт майдончаси, оналар ва болалар хиёбони барпо этилади. Маҳалла тамоман янги қиёфа касб этади.