Фарғона вилояти Сўх туманида хушхабарлар доимо катта шодиёнага айланиб кетади. Президентимизнинг “Халқлар дўстлиги куни муносабати билан бир гуруҳ фаолларни мукофотлаш тўғрисида”ги фармонига асосан туман нуронийлар жамоатчилик кенгаши фаоли Сувҳиддин ота Шарофиддинов “Меҳнат шуҳрати” ордени билан тақдирлангани ҳам шундай бўлди.

Равон қишлоғидаги отахоннинг хонадонидан қутлагани келганларнинг қадами узилгани йўқ. Туман ҳокими Сайидбаҳром Сайидмусаев бошчилигидаги секторлар раҳбарлари отахонни табриклагани уларнинг хонадонида бўлди. Отахонни ушбу юксак мукофот билан табриклаб, анчагина гурунглашди.  

– Меҳнат ва сидқидилдан қилинган саъй-ҳаракат, Ватан равнақига ҳисса қўшган инсон албатта, натижага, самарага эришади. Инсон ҳалол меҳнат қилсагина камолотга етади, ҳурмат ва иззатга сазовор бўлади. Бугун мендан бахтли инсон йўқ, чунки Президентимизнинг эътибори туфайли Ватаннинг ушбу юксак мукофотига сазовор бўлдим.

Бу мукофот эътибор ва эътироф натижасидир. Ёшларга насиҳатим – ҳалол меҳнат қилинг, албатта, ажрини кўрасиз, - дейди отахон. 

Сувҳиддин ота Шарофиддиновнинг асл касби - ўқитувчилик. Бир неча йил бошланғич синфлар муаллими сифатида фаолият олиб борган. Ҳаётининг асосий қисмини халқ хизматига бағишлаган. Нафақага чиққунга қадар маҳалла раиси бўлиб ишлаган Сувҳиддин ота бугун қарилик гаштини сурмоқда.