Мамлакатимизда аҳоли бандлигини таъминлашга алоҳида эътибор қаратилмоқда.

Хонадонларда оилавий тадбиркорлик билан шуғулланиш ва доимий даромад манбаига эга бўлиши учун зарур шароитлар яратилаётир. Бу борада “Ҳар бир оила тадбиркор” дастури асосида ажратилаётган имтиёзли кредитлар  муҳим аҳамият касб этмоқда. 
Наманган шаҳрининг Янги Наманган туманида олиб борилаётган амалий ишлар ҳам ўз самарасини бермоқда. Жумладан, Мустақилликнинг беш йиллиги маҳалласида яшовчи Соҳибжон Дадахоновга ҳоким ёрдамчиси Алишер Ҳамроев кўмагида юзта товуқ ва юзта жўжа олиб берилди. Шу ҳуддуда яшовчи Фахриддин Абдураҳимовга ҳам даромадини ошириш ва уйда турган ҳолда иш билан банд этиш мақсадида имтиёзли кредит асосида 12 та қўй етказиб берилди.  

“Яхши ният – буюк келажак” хусусий корхонаси раҳбари Ойбек Асқаров томонидан эркаклар кийим-кечаклари ишлаб чиқарилади. Тадбиркор авваллари Гўзал маҳалласи ҳудудида ижарада турган ҳолда маҳсулот ишлаб чиқараётган эди. Эндиликда у ҳоким ёрдамчиси кўмагида Мустақилликнинг беш йиллиги маҳалласида иш бошлади. Унга ажратилган бино учун ижара пули Аҳоли бандлигига кўмаклашиш маркази томонидан қоплаб бериладиган бўлди. Мўъжазгина корхонада айни вақтда 12 киши иш билан банд. Тадбиркорнинг айтишича, яна маҳалладаги “Аёллар дафтари” рўйхатига киритилган 12 нафар хотин-қизни ишга қабул қилиш режалаштирилган. 

Ҳудудга масъул сектор раҳбари, туман ҳокими Жобирхон Абдуллаев тадбиркор билан мулоқот қилиб, ишлаб чиқараётган маҳсулотларини кўздан кечирди. Тадбиркорлик учун барча имконият ва шароитлар яратиб берилиши, яқиндан қўллаб-қувватланиши таъкидланди.