“Маҳалла” хайрия жамоат фонди Навоий вилояти бўлими бошқаруви ва Навоий шаҳар “Гулистон” маҳалла фуқаролар йиғини ҳамкорлигида маҳаллада истиқомат қилувчи турли миллат ва элат вакиллари, нуронийлар ва ёшлар иштирокида “Маҳалла бағрикенг – маскан” шиори остида “Уч авлод учрашуви” бўлиб ўтди.

Бугунги кунда мамлакатимизда кексаларни ҳурмат қилиш, уларга ғамхўрлик кўрсатиш давлат сиёсатининг устувор йўналишларидан бирига айланди. Бу борада Президентимизнинг 2022 йил 15 мартдаги “Нуронийларни ҳар томонлама қўллаб-қувватлаш, уларнинг турмуш даражасини оширишга доир қўшимча чора-тадбирлар тўғрисида” ги қарори қабул қилиниб, кексаларни ҳар томонлама қўллаб-қувватлаш, уларнинг турмуш даражаси ва ижтимоий фаолликларини янада оширишнинг устувор вазифалари белгиланди.

– Халқимизда “Қариси бор уйнинг париси бор”, деган ибратли гап бор, – дейди “Маҳалла” хайрия жамоат фонди Навоий вилояти бўлими бошқаруви раиси Фахриддин Солиев. – Дарҳақиқат, кексалари бор хонадонда қувонч, файзу барака, хотиржамлик ҳукм суради. Кексаларга эҳтиром, эътибор ва ғамхўрлик кўрсатиш эса азалий қадриятларимиздан ҳисобланади. Зеро, хонадонларимиз фаришталари – кексаларимиз яқин ўтмишни бугун билан боғлайдиган кўприк бўлиб, ёшларни буюк неъмат – тинчлик-осойишталикнинг қадрига етишга ундайди.

Учрашувда нуроний отахон ва онахонлар ёш авлод вакилларига бугунги кунда мамлакатимизда амалга оширилаётган ислоҳотлар, яратилаётган шарт-шароитлардан оқилона фойдаланиш, тинчлик деган улуғ неъматнинг қадрига етиш, эл-юрт корига яраш – улуғ ва масъулиятли иш экандиги ҳақида гапиришиб, ҳаётий тажрибаларини сўзлаб берди.

– “Бугунги кунда биз кексаларга яратилаётган кенг имкониятлар, енгилликлар, шарт-шароитлар учун Президентимизга ўз миннатдорчилигимизни билдирамиз. Айниқса, “Нуронийларни ҳар томонлама қўллаб-қувватлаш, уларнинг турмуш даражасини оширишга доир қўшимча чора-тадбирлар тўғрисида” ги қарори биз нуронийларга бўлган эътиборнинг яна бир намунаси бўлди. Қарор билан маҳаллаларда нуроний ва кексалар билан ишлаш тизими янада такомиллашмоқда.

 Турли тадбирлар ташкил этилиб, биз каби нуронийларга иззат-ҳурмат кўрсатилмоқда. “Ҳеч ким меҳр ва эътибордан четда қолмасин” шиори остида ижтимоий ҳимояга муҳтож бўлган кексалар ва нуронийлар ҳолидан хабар олинмоқда, – дейди 70 ёшли онахон Мулойим Ашурова.
Тадбир давомида рус, қозоқ, қорақалпоқ миллати вакилларининг ашула ва рақс ансамбллари томонидан хайрия концерти ташкил этилиб, бир гуруҳ маҳалла фаоллари, нуроний онахон ва отахонлар Фонднинг “Ташаккурнома” ва совғалари билан тақдирланди.