Халқ билан мулоқот давлатимиз сиёсатининг энг устувор йўналишларидан бирига айланди. Ҳар бир соҳа мутасаддиси, халқ вакили доимий равишда аҳоли билан бевосита мулоқот қилиб, уларнинг муаммоларини, дарду ташвишларини ўрганмоқда, ваколати доирасида масалаларни ҳал этиш чораларини кўраётир.

Олий Мажлис Сенати Ахборот хизматининг маълум қилишича, жорий йил 28 мартдан 2 апрелгача Сенатда доимий асосда ишловчи сенаторлар Қорақалпоғистон Республикаси, вилоятлар ва Тошкент шаҳрида хизмат сафарида бўлади. Сенаторлар аҳоли, маҳаллий Кенгашлар депутатлари билан учрашувлар ўтказади.  

Мазкур учрашувларда Олий Мажлис Сенатининг йигирма тўртинчи ялпи мажлисида маъқулланган қонунлар ва кўриб чиқилган масалалар мазмун-моҳияти аҳолига тушунтирилади. Сенат аъзолари жойларда аҳолини қийнаб келаётган муаммоларни аниқлаш мақсадида аҳоли билан бевосита мулоқот олиб боради. 

Шунингдек, фуқаролар йиғинлари раислари (оқсоқоллари) сайловига тайёргарлик жараёнларини ўрганиш ва амалий ёрдам кўрсатишга эътибор қаратилади.  

Бундан ташқари, сенаторларнинг ҳудудлардаги иш жадвалида Сенат қарорлари ижроси ва парламент юқори палатасига келиб тушган фуқаролар мурожаатларини жойида кўриб чиқиш ва ҳал қилиш масалалари ҳам ўрин олган.