Самарқанд вилоят суди раиси Олим Ҳайитов ва вилоят маъмурий суди раиси Тоҳир Файзиевнинг навбатдаги сайёр қабули Тойлоқ туман Халқ қабулхонасида ўтказилди.

Тадбирда шунингдек, вилоят суди раисининг ўринбосарлари, жиноят, фуқаролик ва иқтисодий ишлар бўйича судлов ҳайъатлари раислари ҳам иштирок этиб, аҳолининг мурожаатларини эшитди. Қабул давомида жиноят, фуқаролик, иқтисодий ва маъмурий масалалар юзасидан 26 та мурожаат кўриб чиқилди. Уларнинг 17 таси ижобий ҳал қилинди. 9 нафар мурожаатчиларга ҳуқуқий тушунтириш берилди.  

Мамлакатимизда қонун устувор, жиноятга жазо муқаррар. Ҳар ким қилмишига яраша жазосини олиши аниқ. Бироқ, қилмишининг оқибатини англаб етган, пушаймон бўлган, ўзига хулоса чиқарган шахсларга қонунларимизда енгиллик бор. Қабул давомида билдирилган мурожаатлар асосида шу ерда жиноят ишлари бўйича сайёр суд мажлиси ўтказилди. Мажлисда суд томонидан бир қатор шахсларга тайинланган жазолар бекор қилинди. 

Жумладан, А.Ходжакуловга жиноят ишлари бўйича Тойлоқ туман судининг 2021 йил 12 июндаги ҳукми билан 3 йил муддатга озодликни чеклаш жазоси тайинланган эди. А.Ходжакулов қилмишидан пушаймонлик билдириб, бундан тўғри хулоса чиқарганлигини маълум қилди ва тайинланган жазонинг ўталмай қолган 1 йил 5 ойини ўташдан озод қилишни сўради. Сайёр суд мажлисида мазкур мурожаат қаноатлантирилди. Худди шундай яна 5 нафар шахс жазонинг ўталмай қолган қисмидан озод қилинди. Яна 4 нафар шахсга нисбатан қўзғатилган жиноят ишлари бўйича бу фуқароларга ҳуқуқий тушунтириш берилди.