Бухоро вилояти Когон туманининг маъмурий марказига айлантирилаётган “Сухор” маҳалла фуқаролар йиғини ҳудудида 2021 йилда 21 миллиард 105 миллион сўм эвазига 6 та, жами 140 та хонадонга мўлжалланган 5 та кўп қаватли уй-жой барпо этилди.

Жорий йилда худди шу ҳудудда янги лойиҳалар асосида яна 23 миллиард 220 миллион сўмлик 6 та замонавий турар жой, икки ва уч хонали, энергия тежамкор 5 қаватли уй-жой қурилиши бошланган. Қувонарлиси, бу лойиҳа туфайли ҳудуддаги 180 та хонадон уйли бўлади.

– Сухор маҳалласида жами 60 та хонадонга мўлжалланган 3 даҳлизли 5 қаватли замонавий турар жой қурилмоқда, – дейди “Парвоз камфорт” МЧЖ қурилиш ташкилоти раҳбари Ўктам Рамазонов. — Айтиш жоизки, 20 йил муддатга ипотека кредити асосида, уй нархининг 10 фоизи бошланғич тўлов бадали асосида расмийлаштириб берилаётган турар жой биносида сув, табиий газ, электр энергияси каби тармоқлар монтажини бошлаганмиз. Ҳадемай, ўз эгаларига топшириладиган бу уйда 10 та икки хонали, 20 та уч хонали, 30 та бир хонали квартиралар фойдаланишга топширилади. 

Когон тумани “Беклар” маҳалла фуқаролар йиғини ҳудудида бўш ётган 50 гектар ер майдонида ҳам 10 та 5 қаватли, ҳар бири 20 та хонадондан иборат энергия тежамкор, замонавий уй-жой қурилиши бошланади. Бу ерда мактабгача таълим муассасаси, замонавий умумтаълим мактаби ҳамда оилавий шифокорлик пункти қурилиши ҳам режалаштирилган.