Нукусда “Ўзбекистоннинг қишлоқ жойларида давлат хизматларини кўрсатишни ривожлантириш ва бошқарув даражасини ошириш” лойиҳаси доирасида семинар-тренинг бўлиб ўтди.

Давлат хизматлари агентлиги, Европа Иттифоқи ва Бирлашган Миллатлар Ташкилоти Тараққиёт Дастурининг Ўзбекистондаги ваколатхонаси ҳамкорлигида ўтказилган тадбирда Давлат хизматлари агентлиги Қорақалпоғистон Республикаси бошқармаси, шаҳар ва туманлар давлат хизматлари маркази ходимлари, шунингдек, давлат хизматларини кўрсатишда ҳамкор ташкилотлар вакиллари иштирок этди.

Иштирокчилар лойиҳа доирасида давлат хизматларини кўрсатишда вужудга келаётган муаммоли вазиятларни бартараф этиш, кўрсатилаётган хизматларни соддалаштириш бўйича фикр ва таклифларини билдирди.

– Ушбу лойиҳанинг асосий мақсади қишлоқ жойларда давлат хизматлари кўрсатиш сифатини янада ривожлантиришдан иборат, – дейди Давлат хизматлари агентлиги Қорақалпоғистон Республикаси бошқармаси бўлим бошлиғи Х.Нуримбетов. – Шунингдек, ушбу ҳудудларда истиқомат қилувчи аҳоли учун мазкур хизматлардан фойдаланишда қулайликлар яратиш ва амалиётда учрашаётган камчиликларни бартараф этиш муҳим ҳисобланади.

Таъкидланганидек, мазкур семинар-тренинг давлат хизматлари кўрсатиш тизимининг ривожига, фуқароларга, шу жумладан, чекка ҳудуд аҳолисига хизмат кўрсатиш сифатини янада яхшилашга хизмат қилиши шубҳасиз.

Тадбир иштирокчилари ўзларини қизиқтирган саволларга жавоблар олди.