Наманган вилояти ҳокими вазифасини бажарувчи Шавкат Абдураззоқов сектор раҳбарлари ва тегишли ташкилотлар мутасаддилари ҳамроҳлигида Чортоқ туманидаги олис қишлоқларда бўлди.

Боғистон, Қумробод, Бойқишлоқ, Нодирабегим, Деҳқонобод, Сарой маҳаллаларида ўтказилган мулоқотларда халқнинг дарду ташвиши эшитилди. 3 минг 500 дан зиёл аҳоли истиқомат қиладиган Сарой маҳалласида бўлиб ўтган учрашувда кўплаб муаммолар тўпланиб қолгани маълум бўлди.

Хусусан, маҳалланинг тоза ичимлик суви таъминотида муаммолар юзага келган эди. Бу масала 7 километрлик тармоқ тортиш орқали ҳал этиладиган бўлди. Қолаверса, йўлларни таъмирлаш, сим устунлар ўрнатиш, кўчаларни ёритиш бўйича ҳам ўз ечимини кутаётган долзарб вазифалар ҳам бор. Бу борада мутасаддиларга тегишли топшириқ берилди. Қурилиш ва молия бошқармаларига ишни кечиктирмасдан бугуннинг ўзида бошлаш лозимлиги қайд этилди.

Қувонарлиси шундаки, Республикада биринчилардан бўлиб Наманганда шароити оғир, деб топилган маҳаллаларнинг ҳар бирига вилоят маҳаллий бюджетидан 500 миллион сўмдан маблағ ажратилмоқда. Шавкат Абдураззоқов шулар қаторида саройликлар ҳам қўллаб-қувватланишини таъкидлади.

Учрашувда мактаб ва болалар боғчасини таъмирлаш бўйича маҳалла аҳлининг илтимоси эътиборга олинди. Мулоқот тугагач, вилоят раҳбари ҳар икки таълим-тарбия масканини бориб кўрди.