Қашқадарё вилояти Косон туманида Олий Мажлиснинг Инсон ҳуқуқлари бўйича вакили (Омбудсман) томонидан “Омбудсман мактаби” лойиҳаси доирасида очиқ мулоқот ташкил этилди. Ушбу тадбир аҳоли ўртасида ҳуқуқий хабардорликни ошириш ва мурожаатларда кўтарилган муаммоларни жойларда бевосита ўрганиш мақсадида ўтказилди.

Таъкидлаш лозимки, Косон тумани – 2024 йилда Омбудсманга келиб тушган мурожаатлар сони бўйича республикада биринчи ўринни эгаллаган ҳудуд ҳисобланади. Ўтган йил давомида Қашқадарё вилояти бўйича жами 3 минг 274 та мурожаат қабул қилинган бўлса, шундан 818 таси айнан Косон туманига тўғри келади. Бу ҳолат аҳолининг ҳуқуқий муаммоларга нисбатан фаоллиги ва эҳтиёжининг юқорилигини кўрсатади.

Очиқ мулоқот Қашқадарё педагогика техникуми биносида ўтказилиб, унда тумандаги Арабхона, Дўстлик, Нартичуқур, Юқори Оброн, Ўрта Оброн, Қуйи Оброн, Регзор, Бешқўтон каби маҳаллаларда яшовчи фуқаролар фаол иштирок этди.

Тадбирда масъул давлат ташкилотлари, ҳуқуқни муҳофаза қилувчи органлар ва фуқаролик жамияти институтлари вакиллари ҳам иштирок этиб, мурожаатларда кўтарилган масалалар юзасидан жавобгарлик ва ечимларга эътибор қаратди.

Мурожаатлар таҳлилига эътибор қаратилса, фуқаролар мурожаатлари асосан меҳнат ҳуқуқлари, суд ва тергов фаолиятидан норозилик, уй-жой, алимент, коммунал хизматлар ҳамда фирибгарлик каби масалаларни қамраб олган. Бу ҳолат муаммоларнинг кўпинча тузилмавий ва бошқарувга оид ечимларни талаб қилишини кўрсатади.

– Косон туманидан келаётган мурожаатлар сони кўплигини кўриб, айнан шу ернинг ўзида одамлар билан юзма-юз гаплашишни лозим топдик, – дейди  Омбудсман Феруза Эшматова. – Бу мулоқот орқали мурожаатларда тилга олинган соҳаларга дахлдор мутахассисларни жалб этдик. Муҳими одамлар қаерга ва қандай мурожаат қилиш мумкинлигини билиб олиши керак. Шунда муаммолар тизимли равишда ҳал этилади.

Тадбир давомида фуқароларга ҳуқуқий маслаҳатлар берилди, ижтимоий хизматлар сифатини ошириш, ўзбошимчалик билан қурилган иншоотларга ҳуқуқий ёндашув, мулк ҳуқуқини тан олиш каби масалалар муҳокама қилинди. Бундай ёндашув халқаро амалиётда “жамоага асосланган ҳуқуқий ечим” сифатида баҳоланади ва аҳолининг ҳуқуқий имкониятларини кенгайтиришда муҳим ўрин тутади. 

Омбудсман Феруза Эшматова томонидан ўтказилган сайёр қабулда фуқароларнинг мурожаатлари бевосита қабул қилинди ва тегишли ташкилотлар иштирокида жойида ҳал этиш чоралари кўрилди.