Қашқадарё вилояти Шаҳрисабз туманида жойлашган Сарчашма, Ғелон, Ҳисорак, Сайёд каби қишлоқлар қорли тоғлар бағридаги сўлим гўшаларда жойлашган. Она табиатнинг ўзи бу ўлкаларга ўзгача ҳусн бағишлаган.

Куни кеча Қашқадарё вилоят ҳокими М.Азимов бошчилигида вилоятдаги барча соҳа ва ташкилот раҳбарлари туманнинг Сарчашма маҳалласига ташриф буюрди. Маҳалладаги  57-мактаб ҳудудида оммавий сайёр қабул ўтказилди.  

Сайёр қабулда Шаҳрисабз туманидаги Сарчашма, Ғелон, Ҳисорак, Сайёд каби маҳаллалардан келган жами 300 нафардан ортиқ фуқаро иштирок этиб, 130 дан ортиқ мурожаат қабул қилинди. Мурожаатларнинг 110 таси жойида қаноатлантирилди. 21 та мурожаатни ҳал этиш қўшимча ўрганиш ва муддат талаб этгани боис мутасадди ташкилотларга кўрсатма берилиб, ижроси назоратга олинди.  

Жумладан, “Сарчашма” МФЙ ҳудудидаги 57-сонли мактаб филиалида таъмирлаш ишлари бошлаб юборилди. Шу куннинг ўзида қишлоққа 2 дона трансформатор ва 200 дона бетон устун олиб келинди ва ўрнатиш ишлари бошланди. 100 дона маиший газ баллон келтирилиб, эҳтиёжи бор 83 нафар фуқарога тарқатилди.  

Таъкидлаш лозимки, давлатимиз раҳбарининг 2023 йил 28 ноябрдаги тегишли қарори билан Шаҳрисабз туманида “Шаҳрисабз туристик маркази” ташкил этилган. Белгиланган режага мувофиқ ҳудудга хорижий инвесторларни жалб этган ҳолда Шаҳрисабз тумани Ғелон ва Сарчашма қишлоқлари орасида 3 минг гектарли тоғ-чанғи мажмуаси барпо қилинади. 33 километрли Ҳисорак-Ғелон ва Ҳисорак-Сарчашма йўли кенгайтириб, таъмирланади. Албатта, буларнинг барчаси вилоятда туризм салоҳиятини оширишга, бу орқали янги сайёҳлик масканларини ташкил этишга, натижада эса аҳоли бандлигини таъминлашга хизмат қилади.  

Сайёр қабул давомида ҳудудда туризм объекти сифатида кўплаб уй меҳмонхоналар, умумий овқатланиш жойлари ва турли туризм йўналишлари ташкил қилиниб, икки мингдан зиёд янги иш ўрни яратилиши таъкидланди.  

– Вилоят ҳокими бошчилигида барча раҳбарларнинг қишлоғимизга келиб, муаммоларимизни тинглагани бизни хурсанд қилди, – дейди сарчашмалик Лайло Дўстова. – Айниқса, қишлоғимиз хотин-қизлари рўзғор ташвишлари билан ўралашиб қолган. Биз ҳам бирор иш ёки ҳунар билан шуғулланишни истаймиз. Сайёр қабул давомида шу муаммо ҳам кўтарилди. Касаначилик асосида миллий каштачилик маҳсулотларини тайёрлайдиган бўлдик.    

Сайёр қабул доирасида аҳолига қулайлик яратиш мақсадида арзонлаштирилган ярмаркалар ташкил этилди. Шунингдек, 84 нафар фуқаро чуқурлаштирилган тиббий кўрикдан ўтказилди ҳамда зарурий дори-дармонлар билан таъминланди.  

Мутасаддиларга маҳалла аҳолисини вилоят театрларига ташрифини ташкил этиш, нуроний отахон ва онахонларни республикамизнинг қадимий шаҳарларига саёҳатга олиб бориш юзасидан топшириқлар берилди.  

– Қишлоғимиз тоғли ҳудудда жойлашган бўлсада, ичимлик сувидан кейинги йилларда қийналиб қолдик, – дейди Раҳмонқул бобо Элов. – Мавжуд сув минораси эскирган ва талаб даражасида сув етказиб беролмаётган эди. Сув минораси янгиланадиган бўлди. Бундан бир икки йил аввал қишлоғимизга енгил машинада етиб келиш ҳақиқий муаммо эди. Мана йўлларимиз яхшиланиб, ички йўлларимизгача асфальтланмоқда. Бугунги қабул давомида барча йўналишлар бўйича таклиф ва тавсиялар берилди. Қурилиш таъмирлаш ишлари бир пастда бошланиб кетди.    

Ижобий ҳал этилиши ва қўшимча муддат талаб этадиган ички йўлларни таъмирлаш, трансформатор ва темир-бетон устунлар ўрнатиб бериш, ичимлик суви таъминотини яхшилаш каби масалаларни ҳал қилиш бўйича мутасадди ташкилотларга топшириқлар берилиб, ижроси назоратга олинди.  

Шу куни Сарчашма қишлоғидаги 57-мактабга ҳамкор ташкилотлар томонидан олиб келинган бадиий адабиётлар жамланмаси топширилди.  

Сайёр қабул байрам дастурига уланиб кетди. Вилоятдан ташриф буюрган бир гуруҳ санъаткорлар иштирокида ижро этилган куй-қўшиқлар барчани хурсанд қилди.