Тошкент вилоятидаги секторлар раҳбарлари, ўндан зиёд бошқарма ва ташкилот томонидан Бўка туманидаги аҳоли учун оммавий сайёр қабулда Бекобод, Оққўрғон, Пискент туманлари ва Бекобод шаҳридан келган мурожаатчилар ҳам қабул қилинди.

Ҳозир барча давлат идоралари фаолиятида аҳолининг мурожаатлари билан ишлаш бўйича сифат жиҳатидан мутлақо янги тизим яратилган. Бироқ барча инсонлар ҳам ҳудуд марказига бориб, масъул ташкилот эшигини тақиллатишга имкон тополмайди. Шу туфайли жойларда ташкил этилаётган халқ билан мулоқотлар аслида жойлардаги муаммоларни ҳал этишда шак-шубҳасиз кутилган натижаларни бермоқда.

Жумладан, Мажбурий ижро бюросининг Тошкент вилояти бошқармаси бошлиғи Ориф Бозоров томонидан 20 та мурожаат тингланди. Уларнинг аксарияти алимент, қарз ундириш ва бошқа турдаги ижро ҳужжатлари билан боғлиқ масалаларни ташкил этди. Мазкур мурожаатлар назоратга олиниб, тегишли масъулларга топшириқлар берилди.

Тошкент вилояти суди раиси Дилшод Тожибоев ва ҳудудлардаги судлар раислари эса 49 нафар фуқаро ва тадбиркорларнинг соҳага доир мурожаатларини қабул қилди. Уларнинг 15 таси жиноят, 22 таси фуқаролик, 5 таси иқтисодий ва 7 таси маъмурий иш бўйичадир.

Шунингдек, жиноят ишлари бўйича судлар томонидан сайёр суд мажлислари ҳам ўтказилиб, киритилган тақдимнома (илтимоснома)лар асосида 21 нафар маҳкум ўталмай қолган озодликни чеклаш ва ахлоқ тузатиш ишлари жазоларидан муддатидан илгари шартли равишда озод қилинди. 11 нафар маҳкумнинг ўталмай қолган озодликдан маҳрум қилиш жазоси енгилроғига алмаштирилди.

Сайёр қабулда вилоят солиқ бошқармаси мутасаддиларига фуқаролардан 10 та мурожаат келиб тушган бўлса, шундан 7 таси шу ернинг ўзида қаноатлантирилди. Маълум муддат талаб қилинадиган масалалар тегишли идора ва ташкилотларга йўналтирилди.

Масалан, бўкалик Марям Йўлдошева коммунал тўловлардаги солиқ ҳисобланиши юзасидан имтиёзлар берилишини сўраб, ўз илтимосини билдирди. Ушбу фуқаронинг муаммоси масъуллар томонидан кўриб чиқилиб жойида бартараф этилди.

Сайёр қабуллар бошқа ҳудудларда ҳам ўтказилиши режалаштирилган.