Mamlakatimizda o‘g‘il-qizlarning bolalikdan jismonan sog‘lom, ma’nan barkamol etib ulg‘aytirish doimiy e’tiborda. Yurtimizning eng olis, chekka hududlarida ham davlat va nodavlat maktabgacha ta’lim tashkilotlari barpo etilib, zamonaviy usulda jihozlanayotgani ushbu ezgu maqsad yo‘lidagi sa’y-harakatlardan.

Sirdaryo viloyati Boyovut tumanining Boboyurt hamda Muqimiy mahallalarida ham yangidan barpo etilgan 12- hamda 18-davlat maktabgacha ta’lim tashkiloti foydalanishga topshirildi.  

Shu munosabat bilan tashkil etilgan marosimlarda tuman hokimi Dilfuza Uralova, hokim o‘rinbosarlari, maktabgacha va maktab ta’limi bo‘limi mas’ullari, nuroniylar va keng jamoatchilik vakillari ishtirok etdi.

Investitsiya dasturi doirasida ta’mirlanib, qayta qurilgan har ikkala muassasada zamonaviy musiqa zali, oshxona, shinam yotoqxona va o‘yin maydonchalari barpo qilindi hamda zarur jihozlar bilan ta’minlandi. Bolajonlarning har bir kuni mazmunli o‘tishi uchun barcha sharoitlar yaratildi.

Marosimda so‘z olganlar yurtimizda yosh avlodning sog‘lom, ma’nan yetuk insonlar bo‘lib ulg‘ayishi, zamonaviy bilimlarni puxta egallashi uchun yaratilayotgan shart-sharoitlar haqida gapirib, bu ishlarning davomiy bo‘lishiga tilak bildirdi.