Ўзбекистон Республикаси Президентининг Бухоро вилояти Ромитан туманидаги Халқ қабулхонасига жорий йилнинг ўтган даврида фуқаролардан жами 1 минг 638 та мурожаат келиб тушган.

Мурожаатларнинг 1 минг 378 таси туман Халқ қабулхонаси назорати остида кўриб чиқилган. Кўриб чиқилган масалаларнинг 1 минг 97 таси ижобий ҳал этилган. 124 тасига ҳуқуқий тушунтириш берилган, қолган 56 таси ўрганиш жараёнида.

– Фуқароларнинг мурожаатларини жойида ижобий ҳал этиш мақсадида Халқ қабулхонаси томонидан секторлар ва ташкилотлар раҳбарларининг жойларда шахсий ва оммавий сайёр қабуллари ташкил этиб келинмоқда, – дейди Ўзбекистон Республикаси Президентининг Ромитан туманидаги Халқ қабулхонаси мудири Ғ.Муясаров. – Ўтказилаётган сайёр оммавий қабуллар жараёнида фуқаролардан жами 439 та мурожаат келиб тушган бўлиб, ушбу мурожаатларнинг 334 таси яъни 76,1 фоизи жойида қаноатлантирилган.

Жисмоний ва юридик шахсларнинг мурожаатлари билан ишлашда қонун бузилиш ҳолатларининг олдини олиш мақсадида туман Халқ қабулхонаси режасига биноан жорий йил ўтган даври мобайнида тумандаги 21 та ташкилотда мурожаатлар билан ишлаш фаолияти ўрганилган.

– Шунингдек, секторлар, давлат идоралари, ташкилотларнинг аҳоли муаммолари билан ишлаш ҳолатлари бўйича 10 маротаба мониторинг ўтказилди, – дейди Халқ қабулхонаси мудири Ғ.Муясаров. – Ўтказилган ўрганиш ва мониторинглар жараёнларида аниқланган камчиликларни бартараф этиш ва ўзига юклатилган вазифаларни лозим даражада бажармаган масъул ходимларга нисбатан тегишли интизомий таъсир чораларини қўллаш юзасидан туман Халқ қабулхонаси томонидан киритилган 69 та таклиф ва тақдимнома асосида, тумандаги ташкилотларнинг 39 нафар ходимига нисбатан "ҳайфсан", 1 нафар ходимга нисбатан жарима жазоси, 1 нафар ходимни ишдан бўшатиш чоралари қўлланилди.