Бухоро вилояти 4-сектор ишчи гуруҳи томонидан Қоровулбозор туманида навбатдаги сайёр қабул ўтказилди.

Туман сектор раҳбарлари, халқ қабулхонаси, банк, туман бандликка кўмаклашиш маркази вакиллари иштирок этган сайёр қабулда фуқаролар ўз мурожаатларини билдирди.

Сайёр қабул жараёнида 10 нафар талаба ёшга «Талабага мадад» лойиҳасига киритилган ёшларни қўллаб-қувватлаш жамғармаси маблағлари ҳисобидан контракт тўловларини тўлаб бериш учун сертификатлар топширилди.

– Бухоро давлат университетининг Психология факультети 3-босқич талабасиман, – дейди Шамшод Бозоров. – 4-сектор томонидан ўтказилаётган сайёр қабулга келиб янглишмаган эканман. Сабаби, контракт пулларимни тўлашга қийналаётган эдим. Бугун менга ҳам бошқалар қатори сертификат берилди. Бундан ташқари, университетдаги дарсларим тушликдан кейин бошланишини инобатга олиб тушлик вақтигача ишлаш истагим борлигини айтдим. Ишчи гуруҳи томонидан ушбу мурожаатим ҳам ўрганилиб тез кунларда бандлигим таъминланишини билдиришди.

Сайёр қабулда яна бир фуқаро ўғлини тўй қилаётгани ҳамда ушбу тўйни ўтказишда сектор ишчи гуруҳидан амалий ёрдам беришларини сўраб мурожаат қилди. Унинг мурожаати ижобий ҳал этиладиган бўлди.

Бундан ташқари, 2 нафар фуқаро иш сўраб ҳамда 1 нафар фуқаро контракт тўловларини тўлаб беришларига амалий ёрдам сўраб мурожаат қилди. Мурожаатлари ишчи гуруҳи билан ҳал этиладиган бўлди.

Бу каби сайёр қабуллардан кўзланган мақсад, чекка ҳудудлардаги аҳолининг оғирини енгил қилиб уларнинг давлат органларига бўлган ишончини оширишдан иборатдир.