O'zbekiston Respublikasining qonun hujjatlariga muvofiq, murojaat etish huquqining amalga oshirilishi boshqa jismoniy va yuridik shaxslarning huquqlarini, erkinliklarini hamda qonuniy manfaatlarini, shuningdek jamiyat va davlat manfaatlarini buzmasligi kerak.

Jismoniy shaxsning familiyasi (ismi, otasining ismi), uning yashash joyi to'g'risidagi ma'lumotlar yoki yuridik shaxsning to'liq nomi, uning joylashgan eri (pochta manzili) to'g'risidagi ma'lumotlar ko'rsatilmagan yoxud ular haqida yolg'on ma'lumotlar ko'rsatilgan murojaatlar anonim murojaatlar deb hisoblanadi. Anonim murojaatlar ko'rib chiqilmaydi.

Jismoniy shaxslarni va yuridik shaxslarning vakillarini qabul qilish, agar ularning shunday xususiyatga ega bo'lgan ilgarigi murojaati bo'yicha qaror qabul qilingan bo'lsa va bu haqda ularga ushbu Qonunda belgilangan tartibda xabar qilingan bo'lsa, rad etilishi mumkin.

Bila turib yolg'on ma'lumotlar bayon etilgan murojaatlarni ko'rib chiqishda davlat organi tomonidan qilingan xarajatlar jismoniy yoki yuridik shaxsdan sudning qaroriga ko'ra undirib olinishi mumkin.

Tuhmat, ya'ni bila turib yolg'on, boshqa bir shaxsni sharmanda qiluvchi uydirmalarni tarqatish — eng kam ish haqining yigirma baravaridan oltmish baravarigacha miqdorda jarima solishga sabab bo'ladi.

Haqorat qilish, ya'ni shaxsning sha'ni va qadr-qimmatini qasddan kamsitish — eng kam ish haqining yigirma baravaridan qirq baravarigacha miqdorda jarima solishga sabab bo'ladi.

Barcha fuqarolar murojaatlarining o‘z vaqtida va sifatli ko‘rib chiqilishini taʼminlash uchun murojaatga belgilangan muddatlarda javob berilgunga qadar ayni bir masalada ko‘plab murojaatlar yubormaslik maqsadga muvofiq. Bunday holatlar kuzatilganda elektron vositalar orqali ko‘p sonli murojaatlar yuborish imkoniyati texnik jihatdan cheklanishi mumkin.