9-noyabr kuni Prezidentning fan, ta’lim, sog‘liqni saqlash va sport masalalari bo‘yicha davlat maslahatchisi Abdujabbor Abduvohidov O‘zbekiston Milliy universitetida yosh olimlar va tadqiqotchilar bilan respublikamizda amalga oshirilayotgan islohotlar, ta’lim sohasi oldida turgan muammolar, yosh olimlarning ilmiy faoliyatlari, o‘quv jarayoniga oid masalalar xususida ochiq muloqot o‘tkazdi.

Muloqot ochiq va samimiy ruhda o‘tib, unda tayanch doktorant va doktorantlarning stajirovka masalalari, raqobatbardosh kadrlar tayyorlashda amalga oshirilishi kerak bo‘lgan masalalar muhokama qilindi. Milliy universitetda dunyoning etakchi OTMlar ro‘yxatiga kirish yo‘lida qilingan ishlar tahlil qilindi.

Pandemiya sharoitida darslarni tashkil qilish, ta’lim sifati, universitet imiji, xalqaro jurnallardagi maqolalar, talabalar amaliyoti va moddiy-texnika baza haqida ham fikrlar, takliflar bildirildi. Muloqot jarayonida yosh olimlar ta’lim, ilmiy faoliyatlarga tegishli bo‘lgan masalalar bo‘yicha fikr almashdi.

Muloqot yakunida davlat maslahatchisi sohada mavjud muammolarga echimi jiddiy masala ekani, yosh olimlar va tadqiqotchilar ilm-fan sohasini rivojlantirish, o‘z salohiyatlarini jamiyatimiz ravnaqi yo‘lida safarbar etishga chaqirdi.