Navoiy shahrining “Istiqlol”, “Guliston” hamda “Hayot” mahalla fuqarolar yig‘inlari hududida yashovchi yoshlar hamda xotin-qizlar bilan ochiq muloqot o‘tkazildi.

Tadbirda Yoshlar ishlari agentligi Navoiy viloyati boshqarmasi rahbari, senator Jamshid Xodjayev hamda Bandlik bosh boshqarmasi, Navoiy shahar hokimligi va korxona, tashkilotlarning mas’ul xodimlari yoshlar va xotin-qizlarning muammolarini o‘rganib, aksariyat masalalar joyida hal etildi.

– Bugun bizning mahallamizda yoshlar muammolarini hal etish maqsadida uchrashuv bo‘lib o‘tdi. Men ham ushbu muloqotda ishtirok etdim. O‘zim oliy ma’lumotliman. Ayni paytda ishsiz bo‘lganligim, oilam ko‘makka muhtojligi sabab yordam so‘radim. Ular mening masalamni joyida hal etib berishdi. Uch-to‘rt kunda soham bo‘yicha ishga chiqaman. Bundan juda ham mamnunman. Bunday sayyor qabullar biz kabi yoshlarga imkoniyat eshiklarini ochib beradi, – deydi Roza Rahimova.

Ta’kidlash joizki, sayyor qabul jarayonida yoshlar va xotin-qizlarning aksariyati ishsizlik, uy-joy, ijtimoiy muammolar va kredit olishda amaliy yordam so‘rab murojaat etdi. Bu masalalar joyida tegishli mas’ullarga biriktirilgan holda hal etilishi nazoratga olindi.

Manzilli rejaga ko‘ra, yoshlar va xotin-qizlar bilan navbatdagi uchrashuv Xatirchi tuman kasb-hunar maktabida bo‘lib o‘tdi. Unda Oliy Majlis Senati a’zosi Jamshid Xodjayev boshchiligida 4-sektorga qarashli 19 ta mahalla fuqarolar yig‘inilaridagi yoshlar va xotin-qizlarni qiynab kelayotgan muammolar atroflicha o‘rganildi.

Uchrashuvda hududda hal etilmay qolayotgan muammolarga bee’tibor bo‘layotgan sektor rahbari Senator tomonidan jiddiy ogohlantirildi. Zero, ko‘rsatilayotgan kichik befarqlik katta chigalliklarga sabab bo‘lishi, ayni haqiqat. Shuningdek, Senator tumanda faoliyat ko‘rsatayotgan 88 ta umumta’lim maktabi yetakchilari bilan muloqotda bo‘ldi. Uchrashuvda ta’lim-tarbiya jarayonlarida o‘quvchilarga e’tiborni yanada kuchaytirish, ularga mas’uliyatsizlik bilan qaramaslik, o‘z kasbining fidoyisi va jonkuyarlari bo‘lishi kerakligi umumta’lim maktablari boshlang‘ich tashkilot yetakchilariga qo‘yilgan asosiy talab ekanligi ta’kidlandi.