Samarqand shahri kunida samarqandliklar uchun yana bir qulaylik yaratildi - shahar Davlat xizmatlari markazining zamonaviy binosi foydalanishga topshirildi.

Markazning yangi binosi davlat-xususiy sherikchilik asosida "Kayumov stroy invest" mas’uliyati cheklangan jamiyati tomonidan bunyod etildi. Bino eng so‘nggi axborot texnologiyalari asosida jihozlangan. 2 qavatdan iborat markazda elektron navbat tizimi 18 ta monitorda aks etib turadi, 36 ta qabul oynasida ko‘rsatiladigan xizmatlarda shaffoflik asosiy mezon sanaladi.

Zamon talablari darajasida jihozlangan ushbu markaz binosida fuqarolar uchun barcha sharoitlar muhayyo etilgan. Shuningdek, shahar fuqarolik holati dalolatnomalari yozish bo‘limi, tadbirkorlar uchun bosh vazir qabulxonasi, investorlar xonasi, advokatura, notarius va sug‘urta bo‘limi, bank kassasi, haydovchilik guvohnomasini almashtirish hamda fuqarolik pasportini berish bo‘yicha shahar ichki ishlar bo‘limi xodimi xonasi ham tashkil etilgan. Bundan tashqari, kutish zalida mo‘’jaz kitob javoni mavjud bo‘lib, fuqarolar bu erda jahon va o‘zbek adabiyotining durdona asarlarini mutolaa qilish imkoniyatiga ega bo‘lishadi.

Binoning tantanali ochilish marosimida viloyat hokimi E. Turdimov va Adliya vazirligi huzuridagi Davlat xizmatlari agentligi direktori U. Muhammadiev ishtirok etdi.