Namangan viloyati hokimi vazifasini bajaruvchi Shavkat Abdurazzoqov sektor rahbarlari hamrohligida Norin tumanidagi mahalla, tashkilot, muassasalar boʻylab oʻrganishlari davomida fuqarolar bilan muloqotda boʻldi. Ularning masalalari va dardu tashvishlariga quloq tutdi.

“Yashiq” mahalla fuqarolar yigʻini hududida istiqomat qiluvchi Zuhra Abdullayeva hayot sinovlarini sabru bardosh bilan yengib oʻtmoqda. Yolgʻiz boshi bilan 4 yoshli dilbandini kamolga yetkazayotgan ayol uchun uy-joyga ehtiyoji borligi bois mahalladagi sobiq masjid binosidan boshpana berilgandi. Biroq bu yerda yongʻin yuz berib, binoga jiddiy zarar yetgan.

Mavjud vaziyat bilan yaqindan tanishgan viloyat rahbari yolgʻiz onani yangi arzon-uy joy va ish bilan taʼminlash zarurligini aytib, bu borada tegishli soha mutasaddilarga topshiriqlar berdi. Yongʻindan talafot koʻrgan mazkur binoda tadbirkorlik faoliyatini yoʻlga qoʻyish va shu orqali hududda mehnatda band boʻlmagan xotin-qizlarni ishga joylashtrish taklifi ilgari surildi.

Oʻrganishlar davomida Shavkat Abdurazzoqov tumandagi Bobur, Shahidmozor, Suzoqovul va Qoʻrgʻoncha mahallalarida yashovchi aholi vakillari bilan suhbatlashdi. Mazkur mahallalarda aholini uzoq yillar davomida qiynab kelayotgan koʻplab muammolar toʻplanib qolgani ayon boʻldi. Ichimlik suvi taʼminoti, ichki yoʻllarning nosozligi, koʻchalarga tungi yoritish chiroqlari va elektr energiyasi taʼminotini yaxshilash uchun transformator, yangi tayanch ustunlarini oʻrnatish, ichki yoʻllarni taʼmirlash kabi muammolar viloyat hokimining eʼtiborini tortdi. Ayni shu sababli ham Norindagi sharoiti ogʻir mahallalarga 3 milliard soʻm mablagʻ ajratilib, aniqlangan kamchiliklar bartaraf etilishi belgilandi.

– Har bir sektordagi bittadan mahallaga 500 million soʻmdan ajratamiz, –dedi Shavkat Abdurazzoqov. – Faqat bu pullar ikki hissa koʻpayishi kerak. Bu qay tarzda boʻladi? Aytaylik, 1 kilometr masofaga ichimlik suvi tarmogʻi tortish uchun zarur materiallarga 45 million soʻm taqozo etiladi. Agar bunga chetdan ishchi kuchi va texnika olib kelinsa, bu mablagʻ ikki-uch baravar ortib ketishi mumkin. Mahalliy mutasaddilar va aholining oʻzi bunga bosh-qosh boʻlishsa, tejalgan mablagʻni yana boshqa muhim masalalarni hal etishga sarflash mumkin.