Samarqand viloyati hokimi E.Turdimov 26-sentyabr kuni Kattaqoʻrgʻon shahrida, 28-sentyabr kuni esa Urgut tumanida aholi uchun sayyor qabullar oʻtkazdi.

Qabullarda viloyatdagi toʻrt sektor rahbari, boshqarma va idoralar rahbarlari hamda mazkur ikki hudud masʼullari qatnashib, fuqarolarning murojaatlarini tingladi.

Kattaqoʻrgʻonda va Urgutda ham aholi asosan kommunal xizmatlar, yoʻl qurilishi, uy-joy va yer ajratish masalalarida murojaat qildi. Har bir masala shu yerning oʻzida mutasaddilar ishtirokida muhokama etilib, muammoning ijobiy hal etilishi yoki rad etilishi sabablari tushuntirildi. Oʻrganish talab qiladigan masalalar yuzasidan muddat belgilandi.

– Hal etilmaydigan muammoning oʻzi yoʻq, – dedi E.Turdimov. – Agar imkoniyati yoʻq yoki qonunga zid murojaat boʻlsa, bunga shaxsan oʻzim rad javob beryapman.

Haqiqatdan ham qabullar chogʻida ayrim kishilar toʻrt muchasi sogʻ, uy-joyi boʻlsa-da moddiy yordam yoki bepul uy-joy berilishini, imorat qurish uchun yer ajratilishini soʻradi. Bunday kishilarga moddiy yordam koʻrsatish yoki ijtimoiy muhofazaga olishning amaldagi tartiblar tushuntirildi, ish oʻrinlari taklif etildi. Asossiz murojaatlar rad etildi.

Qayd etilishicha, endilikda har haftaning payshanba kuni viloyat hokimligida sayyor qabullarda tushgan murojaatlar ijrosi muhokama qilib boriladi.