Namangan viloyati hokimligi, viloyat ekologiya va atrof-muhitni muhofaza qilish boshqarmasi, “Toza hudud” DUK hamda “Meros” jamgʻarmasi hamkorligida oʻtkazilgan aksiyada viloyat hokimligi, Ekologiya va atrof-muhitni muhofaza qilish boshqarmasi, Yoshlar ittifoqi viloyat kengashi, nuroniylar va mehnat faxriylari, Oʻzbekiston Qahramonlari, volontyorlar, viloyat korxona va tashkilotlari rahbar va xodimlari faol ishtirok etdi.

Mamlakatimizda daraxtzorlar barpo etish orqali atmosfera havosini tozalash va ekologik muvozanatni saqlash maqsadida oʻtkazilayotgan “Yashil Vatanim” aksiyasi doirasida Namangan shahridagi Boborahim Mashrab xiyoboni, viloyat musiqali drama va komediya teatri atrofi, yoʻllar boʻyiga 2 ming 500 tupdan ortiq manzarali daraxt koʻchatlari ekildi.

Taniqli xonandalar, kino va teatr aktyorlari ishtirokidagi madaniy dasturlar, oʻzbekona hashar udumiga muvofiq doshqozonda palov tayyorlab, hasharchilar dasturxoniga tortilgani tadbirga bayramona koʻtarinkilik bagʻishladi.

Viloyat boʻyicha 15 million tupdan koʻproq mevali va manzarali daraxt ekish koʻzda tutilgan aksiya 20-aprelgacha davom etadi.