Navoiy viloyat hokimligi, viloyat adliya boshqarmasi hamda Oʻzbekiston Jurnalistlari ijodiy uyushmasi viloyat boʻlimi tashabbusi bilan fuqarolik jamiyati instituti vakillari, jurnalistlar va madaniyat xodimlari ishtirokida Moʻynoqqa ekotur tashkil etildi.

“Dengiz chekinsa ham, inson chekinmaydi” shiori ostida tashkil etilgan ekotur ishtirokchilari dastavval Moʻynoqdagi zamonaviy “IT Park”, kutubxona hamda Moʻynoq ekologiya muzeyida boʻldi. Muzeyga navoiylik rassomlarning ijod namunalari hamda “Jonli tabiat” nodavlat-notijorat tashkiloti rahbari Eshmamat Togʻayev tomonidan ramziy maʼnodagi kema sovgʻa qilindi.

Ekotur Moʻynoqdagi “Navoiy tashabbus bogʻi”da davom etdi. Ishtirokchilar ezgu niyat bilan bogʻga Navoiydan olib borilgan manzarali daraxt koʻchatlarini oʻtqazishdi.

Keyingi manzil “Kemalar qabristoni” boʻldi. Bu yerda ham ekotur ishtirokchilari tomonidanhududga saksovul ekilib, bio xilma-xillikni taʼminlashga hissa qoʻshish maqsadida 10 ta kaklik tabiat qoʻyniga uchirib yuborildi.

Shu tariqa, navoiyliklar Moʻynoqqa bahorni “olib borishdi”.