Samarqand davlat universitetidagi O‘zbekiston yoshlar ittifoqi boshlang‘ich tashkiloti etakchilari hamda bir guruh faol talabalar Qoraqalpog‘istonning Mo‘ynoq tumanida bo‘lib, Orolning qurigan qismida o‘rmon tashkil etish jarayonida ishtirok etdi.

– Avvalo, Mo‘ynoq tumanida keyingi yillarda amalga oshirilgan o‘zgarishlar, bunyodkorlik ishlari bilan tanishdik, – deydi universitet yoshlari etakchisi Husan To‘xtaev. – Bu yangilanishlar jarayonida yoshlar uchun ham keng imkoniyat, shart-sharoit yaratilganiga guvoh bo‘ldik. Safarimizdan asosiy maqsad esa Orol dengizi o‘rnida paydo bo‘lgan Orolqumda saksovul ekish ishlarida ishtirok etish edi va bu ezgu tashabbusda qatnashganimizdan faxrlanamiz.

Universitet yoshlari Orolqum bag‘rida 2 gektar maydonda saksovul ekib, hududda ekologik barqarorlikni ta’minlashga hissa qo‘shdi.

Samarqand davlat universiteti professor-o‘qituvchilari, biologiya va geografiya fakulьtetlari talabalaridan iborat katta guruh 2019-yilda ham Orolbo‘yiga borib, ilmiy izlanishlar o‘tkazgandi, hududda o‘rmon barpo etishda qatnashgan edi.