Samarqand viloyati hokimi E.Turdimov taniqli tarixchi olim, Mahdumi Aʼzam Dahbediy ilmiy-tadqiqot fondi rahbari Komilxon Kattayevning xonadoniga borib, olim va uning oila aʼzolarini Yangi yil bayrami bilan tabrikladi.

– Biz sizning yurtimiz tarixini oʻrganish, zaminimizdan yetishib chiqqan buyuk allomalar, ayniqsa, Dahbediylar maʼnaviy merosini tadqiq etish borasidagi ishlaringizni yaxshi bilamiz va yuksak qadrlaymiz, – dedi E.Turdimov. – Eng nodir kitoblar jamlangan boy shaxsiy kutubxonangiz ziyosidan xalqimizni bahramand etish borasidagi ishlaringiz ham eʼtirofga loyiq. Biz bu kutubxonani asrab-avaylash va uni kelgusi avlodlarga ham bezavol yetkazishingiz uchun sizni qoʻllab-quvvatlashga va yordam yordam berishga tayyormiz. Komilxon Kattayev viloyat hokimiga shaxsiy kutubxonasida saqlanayotgan 200 dan ortiq nodir kitoblarni koʻrsatdi. Qadimiy Samarqand qogʻozida bitilgan 500-800-yillik tarixga ega Xoʻja Ahrori Valiy maqomati, Movarounnahrdan yetishib chiqqan allomalar, Muqimxon tarixi, Ahmad Yassaviy tariqati haqidagi va boshqa kitoblar toʻgʻrisida maʼlumot berdi. Viloyat hokimi ushbu kitoblarning tarjimalari bor-yoʻqligi bilan qiziqdi hamda ularni keng tadqiq etish uchun olim va uning safdoshlariga sharoit, imkoniyat yaratib berishga tayyorligini bildirdi. Tarixchi olim viloyat hokimiga minnatdorlik bildirib, oʻz kitoblaridan tuhfa qildi.