Mamlakatimizning barcha hududlarida inson manfaatlarini ro‘yobga chiqarishga intilish, ularning orzu-niyatlari bilan qiziqish asosida munosib turmush sharoiti yaratishga doir sa’y-harakatlar izchil davom ettirilmoqda.

Xususan, Adliya vazirining o‘rinbosari A. Tashkulov tomonidan Navoiy viloyatida aholi shu jumladan tadbirkorlik sub’ektlari vakillari bilan sayyor qabullar o‘tkazilib, bunda fuqarolarni tashvishlantirayotgan, qiynayotgan masalalar o‘rganilib, joyida echimi topish choralari ko‘rilmoqda.

Sayyor qabulda fuqarolardan 20 dan ortiq murojaatlar qabul qilindi. Ular, asosan, soliq, tadbirkorlik, bandlik va boshqa ijtimoiy-iqtisodiy masalalar bilan bog‘liq murojaatlar bo‘lib, aksariyati shu joyning o‘zida hal etildi, qolganlari ijroga qabul qilinib, adliya organlari tomonidan tegishli chora-tadbirlar belgilab olindi.

Ayniqsa, aksariyat murojaatlarni videokonferentsaloqa tizimi orqali qabul qilinishi, Navoiy viloyatining barcha tuman (shahar)lari jumladan, olis Zarafshon shahri hamda Tomdi, Uchquduq tumanlarini qamrab olish imkoniyatini yaratdi.

Ommaviy qabulda xotin-qizlar tomonidan ko‘tarilgan muammolar ham atroflicha ko‘rib chiqildi.

Bunda ular tomonidan ko‘tarilgan masalalarning asosiy qismi bandlikni ta’minlash, tijorat banklari kredit mablag‘lari ajratishni kechikayotgani, uy-joy ta’minoti va ijtimoiy himoya borasida bo‘ldi.

Jumladan, Karmana tumanida yashovchi Yu.Rasulova 9 yoshga to‘lgan farzandi haligacha tug‘ilganlik guvohnomasini yo‘qligi sababli turli xil qiyinchiliklarga duch kelayotganligi ma’lum qilib, bu borada amaliy yordam so‘rab qilgan murojaati, shu joyning o‘zida hal etilib, tegishli hujjatlar rasmiylashtirilishiga ko‘maklashildi.

Shuningdek, Navoiy shahrida yashovchi N.Davronovaning meros ishi bo‘yicha qilgan murojaatini ijobiy hal etish choralari ko‘rildi.

Bunday muloqotlar aholi muammolarini bartaraf etilishiga, yashash sharoitini engillashtirishga bevosita ko‘mak beradi.