Mutasaddi tashkilot rahbarlarining xalq bilan muloqot qilishi, ularni qiynayotgan muammolarga echim topishi yurtimizda an’anaga aylandi.

O‘zbekiston Respublikasi Davlat soliq qo‘mitasi raisi Behzod Musaev ishtirokida Qashqadaryo viloyatining Qarshi tumanida o‘tkazilgan sayyor qabul ham tuman aholisining ko‘nglini tog‘dek ko‘tardi. Boisi sayyor qabul davomida tuman aholisining ko‘plab murojaatlariga ijobiy echim topildi.

Samimiy va ochiq ruhda o‘tgan qabulda fuqarolar o‘zlarini qiynab kelayotgan masalalar yuzasidan murojaatlar qildi. 

Jumladan, Qarshi tumani Chaman mahalla fuqarolar yig‘inida yashovchi Dildoraxon Komiljonova ishsizligini aytib, bandligini ta’minlashda amaliy yordam so‘radi. Unga Qarshi tumani Bandlikka ko‘maklashish markazi tomonidan tumandagi bo‘sh ish o‘rni tavsiya etildi. Xuddi shu mahallada yashovchi, ancha yillardan buyon sog‘ligi yo‘qligini aytib, murojaat qilgan Sarvar Kenjaev davolanishi uchun yo‘llanma ajratilishini so‘radi. Ushbu masala viloyat sog‘liqni saqlash boshqarmasi tomonidan nazoratga olindi. Farzandini maktabgacha ta’lim muassasasiga joylashtirishiga amaliy yordam so‘ragan Muqaddam Jalilovaning murojaati shu erning o‘zida hal etildi.

Sayyor qabul davomida tashkil etilgan arzonlashtirilgan mahsulotlar yarmarkasi ham Yangi yil bayrami oldidan aholi uchun yana bir qulaylik yaratdi. 

Shuningdek, sayyor qabul davomida ikki nafar nogironligi bor fuqaroga nogironlik aravachalari topshirildi. Bundan tashqari, aholiga O‘zbekiston Respublikasi Davlat soliq qo‘mitasi raisi tomonidan aholiga esdalik sovg‘a sifatida kitoblar tarqatildi.

Sayyor qabul doirasida mutasaddilar tumandagi ijtimoiy himoyaga muhtoj, kam daromadli, nogironligi bor oilalar holidan xabar olib ularga oziq-ovqat mahsulotlari ulashdi. Masalan, Qarshi tumani Chaman mahallasida yashovchi fuqaro Bozor Botirov ko‘p yillar paxta tozalash zavodida faoliyat ko‘rsatgan. Uch yildirki, xastaligi tufayli to‘shakda yotib qoldi. Uni yo‘qlab kelishganidan bag‘oyatda mamnun bo‘ldi. Xuddi shu mahallada istiqomat qiluvchi Zulayho Xo‘jamurodova ham ancha yildan buyon yura olmaydi. Ijtimoiy himoyaga muhtoj. Mutasaddilar uning ham holidan xabar oldi.